ونزویلا ته د ولسمشر رئیسي سفر
د ایران د اسلامي جمهوریت ولسمشر سید ابراهیم رئیسي له دوستو هېوادونو سره د اړیکو د ښه کولو په موخه، د یوه لوړ پوړي پلاوي په مشرۍ د ونزویلا پلازمېنې کاراکاس ته ولاړ.
د ولسمشرۍ ویب سایټ د معلوماتو له مخې، په دغه سفر کې به د لوړ پوړو پلاویو د ګډو خبرو اترو او د ولسمشرانو د خصوصي خبرو اترو سربېره، د ایران او ونزویلا ترمنځ د دوه اړخیزو همکاریو مهم سندونه د دواړو هېوادونو د چارواکو له خوا لاسلیک شي.
د ونزویلا د ملي شورا له مشر او د کمیسیونونو له رئیسانو سره کتنه او خبرې اترې او د ایران او ونزویلا له اقتصادي فعالانو او سوداګرو سره لیدنه، دغه هېواد ته د ولسمشر رئیسي د سفر په لړ کې د هغه د پلانونو یوه برخه ده.
"نیکاراګوا" او "کیوبا" د لاتینې امریکا سیمې ته د سید ابراهیم رئیسي د رسمي سفر راتلونکي ځایونه دي.
د ایران د دفاع او د وسله والو ځواکونو د ملاتړ وزیر، د بهرنیو چارو، د تیلو، کلتور او اسلامي لارښود او د روغتیا او طب وزیران په دغه سفر کې له رئیسي سره ملګري دي.
