ایراني پانګوالو د افغانستان د کانونو سرپرست وزیر سره لیدلي
د سرپرست حکومت د کانونو او پټرولیم وزارت له یو شمېر ایراني پانګوالو سره د سرپرست وزیر د کتنې خبر ورکړی.
د دغه وزارت له خوا په خپره شوې خبرپاڼه کې راغلي، چې د کانونو او پټرولیم وزارت سرپرست هدایت الله بدري کابل ته په سفر تللي ایراني پانګوالو سره لیده کاته او خبرې اتري کړي.
د اعلامیې له مخې، په دې کتنه کې دواړو لورو د افغانستان د کانونو په سکتور کې د شته ظرفیتونو په اړه خبرې وکړې.
ویل شوي، چې ایراني پانګوالو یو ځل بیا د افغانستان د اوسپنې په کانونو کې پانګونې ته لېوالتیا ښودلې ده.
خبرپاڼې زياته کړه، د کانونو او پټروليم وزارت سرپرست هم په دې کتنه کې د دغه وزارت د کانونو رياست د قوانينو او مقرراتو له مخې د لازمو همکاريو ډاډ ورکړ.
په تېره اوونۍ کې یو شمېر ایراني پانګوالو کابل ته په خپل سفر کې د سرپرست حکومت له بېلا بېلو چارواکو سره لیده کاته کړي.
دغې ډلې د رئیس الوزرا له اقتصادي مرستیال ملا برادر سره په کتنه کې د افغانستان د اوسپنې د کانونو په سکټور کې د پانګونې پر لېوالتیا هم ټینګار وکړ.
