۸۱ ایراني پوهنتونونه د ټایمز آسیا په درجه بندۍ کې
پارس ټوډې – ایران د ۸۱ پوهنتونونو په درلودو سره، د ټایمز آسیا پوهنتونونو په درجه بندۍ کې له ترکیې وروسته، د اسلامي هېوادونو په منځ کې دویم مقام ترلاسه کړ.
د ټایمز د درجه بندۍ اداره په نړیواله کچه د درجه بندۍ یو له هغو نړیوالو معتبرو ادارو څخه ده چې په ۲۰۱۳ کال کې یې د لومړي ځل لپاره د خپلو نړیوالو درجه بنديو ترڅنګ، د آسیا پوهنتونونه درجه بندي کړل.
د پارس ټوډې د راپور له مخې؛ د اسلامي نړۍ د ساینس او ټکنالوژۍ د حوالې او څارنې انسټیټیوټ (ISC) مشر محمد مهدي علویان مهر وویل: په ۲۰۲۵ کال کې د آسیایي پوهنتونونو د درجه بندۍ په وروستي راپور کې، د ایران ۸۱ پوهنتونونه شامل وو، چې له دې جملې څخه د ایران د اسلامي جمهوریت ۴ پوهنتونونه د آسیا د غوره ۱۰۰ پوهنتونونو په ډله کې وو.
علویان مهر زیاته کړه: د آسیا ټایمز په ۲۰۲۵ کال درجه بندۍ کې، له ۳۵ هېوادونو څخه ۸۵۳ پوهنتونونه شامل دي. لکه د تېرو کلونو په څېر، جاپان د ۱۱۹ پوهنتونو په درلودو سره، په دې درجه بندۍ کې د پوهنتونونو ترټولو لوی شمېر لري، ورپسې هند په ۱۰۷ ښوونیزو مؤسسو سره په ورپسې ځای کې دی.
د ټایمز اسیا درجه بندۍ ۲۰۲۵ کې د پوهنتونونو د شمېر له مخې د ایران ونډه ۸۱ پوهنتونونه دي، چې په دې درجه بندۍ کې د پوهنتونونو شاوخوا ۱۰.۵۳ سلنه برخه پکې شامله ده.
د شریف صنعتي پوهنتون، د امیر کبیر صنعتي پوهنتون، د ایران د علم او صنعت پوهنتون، د تهران پوهنتون او د تهران د طبي علومو پوهنتون په ترتیب سره په ایران کې له لومړي څخه تر پنځم مقام خپل کړی دی.
د ISC انسټیټیوټ د مشر په وینا، د آسیا براعظم د اسلامي هېوادونو په منځ کې، د ۲۰۲۵ کال په درجه بندۍ کې له ۲۰ اسلامي هېوادونو څخه ټولټال ۳۸۱پوهنتونونه شامل دي.
