عراقچي: ډېر هیوادونه هڅه کوي د ایران او امریکا ترمنځ منځګړیتوب وکړي
د ایران د بهرنیو چارو وزیر وویل، ډېر هیوادونه هڅه کوي د ایران او امریکا ترمنځ منځګړیتوب وکړي او دا یوازې د قطر موضوع نه ده.
«سید عباس عراقچي»، د ایران اسلامي جمهوریت د بهرنیو چارو وزیر، د سې شنبې په ورځ د اقتصادي همکارۍ سازمان (اکو) په غونډه کې له خبریالانو سره خبرې وکړې او د اکو پیاوړتیا، د قفقاز موضوعات، د صهیونیستي رژیم پر وړاندې مقابله، د ایران او امریکا ترمنځ احتمالي خبرې اترې او د ملګرو ملتونو په عمومي اسمبلۍ کې د ایران شتون په اړه یې خبرې وکړې.
د ایران د بهرنیو چارو وزیر د دوحې په ګډه غونډه کې د اسلامي همکارۍ سازمان او عربي اتحادیې په اړه وویل: دا غونډه په حساسو شرایطو کې ترسره شوه او د صهیونیستي رژیم له لوري د سیمې هیوادونو لپاره د رامنځته شوي خطر په هکله و.
د ایران خارجه وزیر ټینګار وکړ چي د صهیونیستي رژیم یرغل د سیمې ټولو هیوادونو لپاره یو حقیقي واقعیت دی او اوسنی تمرکز د دې خطر پر وړاندې د مقابلې پر لارو چارو دی.
هغه د قطر د منځګړیتوب د رول په اړه د یوې پوښتنې په ځواب کې وویل: په سیمه کې ډېر هیوادونه هڅه کوي مثبت رول ولوبوي، خو اصلي موضوع د مقابل لوري یعني د امریکا اراده ده چې د متقابلو ګټو پر بنسټ او بې له ګواښ توافق ته ورسیږي. که دوی دې ټکي ته ورسیږي، نور موضوعات به حل شي.