بابونه؛ د ایران په دودیزه درملنه کې ډېر کارېدونکی بوټی

پارس تودي – بابونه، د خپلو سپینو او زېړو ګلونو سره، په دودیزه درملنه کې یو له تر ټولو پیژندل شویو درملي بوټو څخه دی. دا بوټی، چې ګرم او وچ طبیعت لري، له پیړیو راهیسې د ډېرو ناروغیو په درملنه کې کارول شوی دی.

بابونه د ایران او نړۍ په دودیزه درملنه کې یو له مشهورو درملي بوټو څخه دی. د پارس تودي د راپور له مخې، دا کوچنی ګل، چې ګرم او وچ طبیعت لري، د ډېرو ناروغیو په درملنه کې رول لري او په دودیزو درملي سرچینو کې د "معدې اصلاح کوونکي" او "زړه خوشحاله کوونکي" په توګه یاد شوی دی.

د هاضمي جهاز لپاره ګټې: بابونه د هاضمي ستونزو په درملنه کې کارول کیږي. د دې دم کړې چای د نس باد له مینځه وړي، د هاضمي سیسټم د عضلاتو انقباض اراموي او د معدې د درد په کمولو کې اغېزمن دی. په دودیزه درملنه کې، هغو کسانو ته چې د هضم له ستونزو، کولمو درد یا د اشتها له نشتوالي سره مخ وي، د بابونې چای د منظم استعمال سپارښتنه کیږي.

د اعصابو اراموونکی: د بابونه یوه له مهمو ځانګړتیاوو څخه د هغې اراموونکې اغېزه ده. د خوب څخه مخکې د بابونې دم کړې شوی چای څښل د خوب کیفیت ښه کوي او سټرس کموي. دا خاصیت د دې لامل شوی چې په دودیزه درملنه کې د بې خوبۍ، خفيف خپګان او عصبي فشارونو په درملنه کې ترې ګټه واخیستل شي.

پوست لپاره یې ګټې:  بابونه د پاړسوب ضد او ضد عفوني کوونکي ځانګړنې لري. د دې وچو ګلونو بخار د پوست پاکولو او د دانو کمولو لپاره ګټور دی. همدارنګه، د سطحي زخمونو، لږو سوځیدنو او د سترګو د التهاب (لکه د سترګو پړسوب) په درملنه کې کارول کیږي.

بابونه یو مقاوم بوټی دی چې په شګو او چونې خاورو کې، د اوبو په کم ضرورت سره، ښه وده کوي. له همدې امله، د ایران په ډېرو سړو او نیمه وچو سیمو کې، هم په خپل طبیعي حالت او هم په کښت شوي بڼه موندل کیږي.

که څه هم بابونه یو نرم بوټی دی، خو ډېر استعمال یې کولای شي د زیات خوب احساس، د معدې لمسون یا حساسیت رامنځته کړي. امیندوارې ښځې هم باید په احتیاط سره ترې کار واخلي.

بابونه، دا کوچنی او خوشبویي ګل، د طبیعت د درملنې د ځواک سمبول دی؛ یو پیوند د دود او روغتیا ترمنځ چې لا هم د ایرانیانو په کورونو کې ژوندی دی.