ایران د اروپا ریاکارو بندیزونو ته هېڅ ارزښت نه ورکوي
پارس ټوډې - د ایران د اسلامی جمهوریت د بهرنیو چارو د وزارت حقوقي او نړیوال مرستیال کاظم غریبآبادي وویل چې تهران د اروپا ریاکارو بندیزونو ته هېڅ ارزښت نه ورکوي.
د پارس ټوډې د راپور له مخې،غریبآبادي وویل؛نن د اروپائي ټولنې شورا په یوه دوکه ورکوونکي او منافقانه اقدام کې د هرمز تنګي په تړاو پر یو شمېر ایرانيو شخصیّتونو او بنسټونو تش په نامه بندیزونه تصویب کړل.
هغه زیاته کړه: دا په داسې حال کې دي چې د اروپائي ټولنې غړي هېوادونه خپله د ایران د ملت د حقوقو له سترو خلاف ورزي کونکو څخه دي، او دغې ټولنې د ایران پر ضد د امریکا د سمندري کلابندئ په اړه ئې، چې د جنګ یو عمل ګڼل کېږي، په قصدي ډول چُپتیا غوره کړې ده.
د ایران د بهرنیو چارو وزارت حقوقي او نړیوالو چارو مرستیال وویل: باید یادونه وشي چې ایران د سمندري حقوقو د کنونشن غړی نه دی. د هرمز تنګي په اړه د ایران د ټینګار وړَ حقوقي رژیم، د نړیوالو عُرفي حقوقو په اساس «بېضرره تګ راتګ» دی، چې د ساحلي حکومت د سمندري تګ راتګ خوندیتوب او امنیتي ملاحظاتو درناوی پکې شامل دي.
غریبآبادي ټینګار وکړ: ایران د اروپا دغه سیاسي او ریاکار اقدام ته هېڅ ارزښت نه ورکوي او د هرمز تنګي د حاکمیت ساتلو او پر هغه د خپلو حاکمیتي حقوقو د پلي کولو په برخې کې به خپلې تګلارې ته دوام ورکړي.
