غریب‌ابادي: د ایران ملت د ګواښ پر وړاندې لا ټینګ درېږي

پارس‌ ټوډی – د ایران د بهرنیو چارو وزارت مرستیال ټینګار کړی، چې د ایران ملت نن خپل برخلیک ټاکي، د فشار پر وړاندې شاتګ نه کوي او د تحمیل او ګواښ پر وړاندې لا ټینګ درېږي.

د پارس‌ ټوډی د راپور له مخې، چې د صداوسیما خبري اژانس په حواله یې خپور کړی، د ایران د بهرنیو چارو وزارت مرستیال کاظم غریب‌ابادي د زمري د ۲۸مې کودتا د کلیزې په مناسبت په ټولنیزو رسنیو کې ولیکل: «د ۱۳۳۲ لمریز کال د زمري د ۲۸مې کودتا د ایران د ملت په اراده او د خپل برخلیک د ټاکلو پر حق د امریکا او بریتانیا مستقیمه لاسوهنه وه؛ داسې تاریخ چې نه پاکول کېدای شي او نه هېرول کېدای.»

هغه زیاته کړه: «د یوه ملت په برخلیک کې بهرنۍ لاسوهنه، په هر نوم چې وي، استعمار او د خلکو د حاکمیت پر حق تېری دی.»

غریب‌ابادي وویل: «نسلونه تېرېږي، خو یوه حقیقت نه بدلېږي؛ هغه هېواد چې د خپل برخلیک واک یوه پردي ته وسپاري، دروند قیمت به یې ورکړي.»