د امریکې خرابونکي سیاستونه د شخړې د سختیدو سبب شوې دي

د ایران د ایټمي انرجۍ د ادارې ویاند وویل: د امریکې خرابونکي سیاستونه په سیمه کښې د شخړو او کشالو د زیاتیدو لامل شوې دي.

د ایرنا د رپورټ له مخې بهروز کمالوندي پرون په تهران کښې د مینځني ختیځ په چارو کښې د انګلستان د سلاکار وزیر انډریو موریسن په کتنه کښې، د ایټمي موافقې د ۲۶ او ۳۶ بندونو په چوکاټ کښې د اعلان شویو اقداماتو په اجرا کښې د ایران په جدیت باندې ټینګار وکړ او ویې ویل: د بډایه شویو یورانیمو تولید به د هغه څه په بنیاد چې د اسلامي ایران ولسمشر او د ملي امنیت د عالي شورا مشر ټاکلې دي، دوام ولري.

هغه وویل چې د امریکې له خوا لګیدلي بندیزونه په ماتې محکوم دي.

د ایران او انګلستان دغو دواړو چارواکو د سیمه ایزو او نړیوالو مسائلو په هکله د وروستیو بدلونونو په هکله هم د نظر تبادله وکړه.