د لبناني قبيلو، ګوندونو او شخصيتونو په يووالي د ايران تاکيد
د ايران د اسلامي جمهوريت د خارجه وزارت وياند بېګا د لبنان د روانو حالاتو او د دغه هېواد د وزيراعظم د استعفاء په ردعمل کښې اميد څرګند کړ چې د لبنان ملت او حکومت به دغه مهمه او حساسه دوره په کاميابۍ او يو زړۀ توب سره تېره کړي.
د پارس ټوډے خبري آژانس د رپوټ له مخې سيد عباس موسوي د لبنان دوست او ورور هېواد په ثبات او قرارۍ باندې په تاکيد سره وويل، د ايران اسلامي جمهوريت د لبنان د ثبات او امنيت د ساتنې او په آرامه فضاء کښې د دغه هېواد د خلقو د روا غوښتنو د پوره کېدو لپاره د لبناني قبيلو، ګوندونو او شخصيتونو په پيوستون، يووالي او يوزړۀ توب تاکيد لري.
د لبنان وزيراعظم سعد الحريري پرون د دغه هېواد د خلقود احتجاجونو په ديارلسمه ورځ په يو اخباري کانفرنس کښې د خپلې او د لبنان د حکومت استعفاء اعلان کړه.
الحريري چې په لبنان کښې د احتجاجونو د شروع کېدو له وخت نه يې د دويم ځل لپاره د احتجاج کونکو لپاره وېنا کوله وويل، هغه بندون ته رسېدلے دے او خپله استعفاء ولسمشر مېشل عون ته وړاندې کوي.
سعودي له دې مخکښې اعلان کړے ؤ چې دسعدالحريري له استعفاء څخه ملاتړ کوي.
خو د لبنان د حزب ا... مشر سيد حسن نصرا...د الحريري له استعفاء سره د مخالفت ترڅنګه د خلقو په وړاندې د لبناني چارواکو د ذمه واري قبلونې په لازموالي تاکيد کړے ؤ.
لبنان د اکتوبر د روانې مياشتې له اولسمې نېټې څخه د ټېکسونو په حالت او اقتصادي بحران باندې په اعتراض کښې د خلقو د احتجاجي مظاهرو کتونکے دے.
