د ایران د ملت پرضد د امریکا اقتصادي ترهګرۍ دوام لري
ایران پریس خبري اژانس وايي د اسلامي ایران ولسمشر حسن روحاني په تیر کال کښې د ایران د ملت پرضد د امریکا بایکاټونو او اقتصادي مشکلاتو ته په اشارې سره وویل د ایران د ملت پرضد اقتصادي ترهګرۍ او بې ساری جنایت اوس هم دوام لري .
حسن روحاني نن د بازار د تنظیم د کمیټۍ په غونډې کښې وویل ټول پوهیږي چې مونږ د ایران پرضد له یوه درې (۳) کلن اقتصادي جنګ سره مخ یو او ټول مشهور او مهم نظر خاوندان اعتراف کوي که چیرې دا ډول اقتصادي جنګ د بل کوم هیواد پرضد تپل کیدلی نو د هغه هیواد اقتصاد به دړې وړې کیده .
د ایران ولسمشر حسن روحاني وویل مونږ په تیرو دریو (۳) کلونو کښې دغه ټول اقتصادي مشکلات وزغمل امریکا حتی د ایران د خلکو په ضرورت وړ اساسي شیانو او خواړو کښې هم لاسوهنه وکړه او په ډیرو موردونو کښې یې د ایران پرضد بندیزونه ولګول .
دا د تاریخ په اوږدو کښې د امریکا ترټولو ستر شرم یعني اقتصادي ترهګرۍ او بې ساری جنایت دی چې د دنیا خلکو هغه ولید او اوس هم دوام لري .
