د پاکستان او چین خارجه وزیرانو د افغانستان حالات وڅیړل
د پاکستان د بهرنيو چارو وزير بلاول بوټو زرداري دا ځل چین ته د سفر په ترڅ کې له چینايي چارواکو سره د افغانستان د وضعیت او روان ناورين په حل لارو خبرې کړي دي.
تاند خبري سایټ لیکلي چې د پاکستان د بهرنيو چارو وزارت ویلي دې، نوموړي له خپل چینايي سیال سره په لیدنه کې د نورو موضوعاتو ترڅنګ په افغانستان کې د «پراخ سياسي جوړښت» او د ښځو او ماشومانو د حقونو په ساتلو بحث او خبرې کړي دي.
پاکستان خبرداری ورکړی، چې په افغانستان کې روان انساني ناورين ښايي د دغه هېواد د اقتصادي پاشلتيا سبب شي، چې دا پاشلتيا به د افغانستان تر څنګ د سیمې هېوادونو ته هم بدې پايلې ولري.
د پاکستاني وزير دا څرګندونې په داسې مهال دي، چې پرون د افغانستان د حاکمو طالب چارواکو يو شمېر مشرانو د خپل پخواني مشر ملا اختر منصور د وژل کيدو په تلين غونډه کې له سقوط څخه د افغانستان د اقتصادي ژغورنې خبر ورکړ.
