پاکستان له افغانستان څخه ډبرو سکرو په وارداتو تعرفه زیاته کړې
د پاکستاني سرچینو په وینا، په کراچۍ کې د ګمرکونو د ارزونې عمومي ریاست له افغانستان څخه د ډبرو سکرو د واردولو ګمرکي تعرفه له ۸۳ ډالرو څخه ۱۴۰ ډالرو ته لوړه کړې ده.
د پاکستان د خیبر پښتونخوا د ګمرکونو ریاست اوا ته ویلي چې د ډبرو سکرو د ارزونې دغه سپارښتنې په کراچۍ کې د ګمرکونو د ارزونې د عمومي ریاست له خوا صادر شوي دي.
تر دې وړاندې د افغانستان د ډبرو سکرو پر هر متریک ټنه ګمرکي تعرفه ۸۳ ډالره وه.
په همدې حال کې له افغانستان څخه د ډبرو سکرو یو شمېر واردونکو په خیبر پښتونخوا ایالت کې د پاکستان د ګمرک ریاست ته مراجعه کړې او ویلي یې دي چې په دې وروستیو کې د افغانستان د ډبرو سکرو ارزښت خورا لوړ شوی، نو باید پر دغه محصول ګمرکي تعرفه هم لوړه شي.
دغه راز له دغه رياست څخه غوښتل شوي، چې د افغاني ډبرو سکرو په ګمرکي تعرفو کې د نوي بدلون لپاره په موقتي توګه د افغاني سکرو په ارزښت کې د بدلون تر راتلو پورې دوام ورکړي.
د افغانستان د ډبرو سکرو د هر متریک ټنه بیه ۲۸۰ ډالره ده.
پاکستان په داسې حال کې د افغانستان د ډبرو سکرو پر ګمرکي تعرفو د لوړولو اعلان کوي، چې هره ورځ د افغانستان د ډبرو سکرو په سلګونو لارۍ پاکستان ته ځي.
