د افغانستان سفیر د پاکستان د پوځ له قومندان سره وکتل

د پاکستان لپاره د افغانستان ټاکل شوی سفیر حضرت عمر زاخیلوال د پاکستان د پوځ له مشر جنرال راحیل شریف سره ملاقات وکړ او د دواړو هیوادونو د ګډې پولې د امنیت په هکله یې د نظر تبادله وکړه.

د پاکستان د پوځ لخوا په خپره شوې خبرپاڼه کښې راغلی چې د پاکستان لخوا د افغانستان منتخب سفیر حضرت عمر زاخیلوال نن په راولپنډۍ کښې د پاکستان د ځمکنی پوځ له قومندان جنرال راحیل شریف سره ملاقات وکړ. په دغه کتنه کښې د پاک افغان کډې پولې د امنیت د ښه کولو په اړه اقداماتو په شمول د ګډو ګټو په چارو باندې خبرې اترې وشوې.