د پاکستان لومړی وزیر امریکا ته له سفر مخکې بریتانیا ته لاړ
پاکستاني رسنیو راپور ورکړی چې د دغه هېواد لومړی وزیر شهباز شریف د ملګرو ملتونو په عمومي اسمبلۍ کې د ګډون په موخه امریکا ته له سفر مخکې د لنډې مودې لپاره د بریتانیا پلازمېنې لندن ته رسېدلی دی.
اجنیوز نن لیکلي چې شهباز شریف به دوه ورځې په لندن کې پاتې شي.
ټاکل شوې د پاکستان لومړی وزیر عمومي اسمبلۍ ته وینا وکړي.
د دغه راپور پر بنسټ، د پاکستان د بهرنیو چارو وزیر اسحاقدار به د ډیپلوماټیکو تعاملاتو او د شانګهای د همکارۍ سازمان سرمشریزې ته د چمتووالي له کبله نیویارک ته سفر ونه کړي.
ورته مهال، په ملګرو ملتونو کې د پاکستان دايمي استازی منير اکرم امريکايي رسنيو ته ويلي چې لا څرګنده نه ده چې د شهباز شريف او د امريکا ولسمشر جو بایډن ترمنځ رسمي ليدنه د عمومي اسمبلۍ د غونډې په څنډه وشي.
ویل کېږي چې د پاکستان لومړی وزیر به د ملګرو ملتونو له سرمنشي او نورو هېوادونو له مشرانو سره وویني.
