هند او پاکستان يو بل له اوربنده په "سرغړونو" تورنوي
زمونږ خبریال راپور راکړی هند او پاکستان یو پر بل تورونه لګولي چې د اوربند له اعلان څو ساعته وروسته يې ترې سرغړونې کړې دي.
دواړو هېوادونو له څو ورځنيو بريدونو وروسته د اوربند پر هوکړه سلا شوي. وروسته له هغه چې د هند تر ادارې لاندې کشمير کې د چاودونو غږونه واورېدل شول د هند د بهرنيو چارو وزير وېکرم مېسري وويل، "زموږ تر منځ چې کومه هوکړه شوې، پرلپسې ترې سرغړونې شوې دي".
له دې لږ وروسته د پاکستان د بهرنیو چارو وزات وويل، هېواد يې د "اوربند رېښتيني پلې کولو ته ژمن دی، که څه هم هند په ځينو سيمو کې سرغړونې کړې دي."
د پاکستان او هند تر منځ د تېرو څو ورځو نښتې په وروستیو څو لسيزو کې تر ټولو جدی نښتې بلل کېږي.
د ډرون او توغنديو بريدونه هغه مهال پیل شول چې هند د تېرې مياشتې په پای کې د پهلګام په بريد کې د وژل شويو کسانو د غچ اخيستو په موخه په پاکستان او د پاکستان تر ادارې لاندې کشمير کې مرکزونه په نښه کړل.
پاکستان د پهلګام په بريد کې لاس لرل رد کړي دي.
د څلورو ورځو بريدونو وروسته هند او پاکستان پرون پر سملاسي او بشپړ اوربند سلا شول.
د امریکا ولسمشر ډونلډ ټرمپ د شنبې په ورځ پر ټولنيزه رسنۍ ټروت اعلان وکړ چې د پاکستان او هند تر منځ د اوربند هوکړه د امريکا په منځګړيتوب شوې ده.
