د امریکې د ګواښونو هیڅ پروا نه کوو
د پاکستان دفاع وزیر ټینګار وکړ چې د اسلام آباد خلاف د واشنګټن ګواښونه او په پاکستان باندې د امریکې د مالي مرستو بندول د پاکستان په اقتصاد هیڅ اغیزه نه کوي.
د تسنیم خبري آژانس د خبر له مخې د پاکستان دفاع وزیر خرم دستګیر خان د خپل هیواد خلاف د امریکې د ولسمشر ډونلډ ټرمپ په تورونو باندې په نیوکې سره وویل: د امریکې ګواښونه له چین سره د اسلام آباد ښې اړیکې نه شي خرابولی او ټاکل شوې چې د پاکستان خارجه وزیر خواجه محمد آصف ډیر زر بیجنګ ته په سفر لاړ شي.
خرم دستګیر خان زیاته کړه: د اسلام آباد حکومت نه پریږدي چې له ترهګرۍ سره په مبارزه کښې د لسګونو زره پاکستانیانو تویه شوې وینه ضایع شي.
د ویلو ده چې د امریکې ولسمشر ډونلډ ټرمپ په دې وروستیو کښې د افغانستان لپاره په خپله نوې سټراټیجۍ کښې پاکستان د ترهګرۍ ملاتړی بللی او ګواښ یې کړی و چې که اسلام آباد په خپله خاوره کښې د ترهګرو مرکزونه ختم نه کړي نو په دغه هیواد به مالي مرسته بنده کړي.
