پاکستان د ډنډپټان لاره تړلی
د افغانستان چارواکې وایی چی د ډنډپټان لاره د سوداګرو په وړاندی تړلی او دا ددی ورورسته شوی چی همدی سرحدی سیمه کې ځینی پاکستانې نظامی تاسیسات افغان ځواکونو ته وسپارل شول.
د افغان حکومت په وینا دا نظامی تاسیسات د پاکستانی پوځیانو له لوری د ډیورنډ کرښې دې غاړې ته جوړ شوی وو، خو د طالبانو پرضد له عملیاتو وروسته دا سیمه، افغان حکومت په ولکه کې واخیستله.
د پکتیا د سوداګرۍ د خونو رئیس«عبدالنصیر عالمیار» په وینا د ډنډپټان لارې په تړل کېدو سره د کرښې دواړو غاړو ته لسګونه لارۍ موټرې چې په سوداګریزو مالونو بار دی، د لارې د خلاصېدو په تمه ولاړې دی.
د سوداګرۍ د خونو رئیس ښاغلی عالمیار همدارنګه وویل، چې د دې لارې د خلاصېدو په اړه د دواړو غاړو د سوداګرو او چارواکو ترمنځ خبرې شوې، خو ظاهراً تر اوسه کومې نتیجې ته نه دی رسیدلی.
د ډنډپټان لاره یوه غیر رسمی ترانزیټی لاره ده، چې د تورخم او سپین بولدک لارو په څېر، پرې سوداګریز مالونه انتقالېږی. د پکتیا، لوګر، غزنی او د ځینو نورو ولایتونو یو شمېر سوداګر، له دې لارې واردات او صادرات لری.