دپاکستان موقته لومړی وزیر وټاکل شو

زمونږ خبریال وایی د پاکستان حکومت او مخالف پیپلز ګوند د موقته لومړی وزیر لپاره د سترې محکمې د پخوانی قاضی ناصر الملک نوم اعلان کړ .

دپاکستان په ملی پارلمان کښې د حکومت دمخالف  پیپلز ګوند یوه مشر خورشید شاه له لومړی وزیر شاهد خاقان عباسی سره یوځاې په اسلام اباد کښې په یوه خبری کانفرنس کښې د موقته لومړی وزارت لپاره د سترې محکمې د پخوانی قاضی ناصر الملک نوم اعلان کړ .

دپاکستان دپیپلز ګوند یوه مشر خورشید شاه وویل د موقته لومړی وزیر دنوم په هکله په یوه خوله کیدل زمونږ لپاره ډیر ستر چیلنج وو او ناصر الملک زمونږ لپاره ډیر د عزت او داحترام وړ کس دی .

دپاکستان لومړی وزیر شاهد خاقان عباسی هم وویل چې د ناصر الملک ټاکل به د هیواد دډیموکراټیکې پروسې لپاره ډیره ګټه ولری .

هغه وویل موقته لومړی وزیر داسې کس ټاکل شوی دی چې ښه مخینه لری .

دپاکستان موقته لومړی وزیر ناصر الملک د خیبر پښتونخوا صوبې د سوات په مینګوره سیمه کښې زیږیدلی او هغه دپیښور د لوړې محکمې قاضی   او بیا د سترې محکمې قاضی پاتی شوی دی