دپاکستان متحده قومی موومنټ دتحریک انصاف ملاتړ وکړ

زمونږ خبریال وایی دپاکستان متحده قومی موومنټ (Muttahida Qaumi Movement-Pakistan) پرون له تحریک انصاف سره یوه موافقه لاسلیک کړه او ژمنه یې وکړه په مرکز کښې د حکومت د جوړولو لپاره به دتحریک انصاف ملاتړ وکړی .

د پاکستان تحریک انصاف هم د راتلونکی فیدرال حکومت د جوړولو لپاره د متحده قومی موومنټ د ملاتړ په بدل کښې ژمنه وکړه چې دکراچۍ لپاره به ځانګړی فیډرال پکیج(special federal package) اعلان  کړی او د  ښار خلکو ته به د اوبو د رسولو چارې اسانې کړی .

په دې سربیره د پاکستان تحریک انصاف موافقه وکړه چې دسیند صوبې دپولیسو اصلاحات به عملی شی ، په حیدر  اباد کښې به یو پوهنتون جوړ کړی او دانتخاباتو حوزې چې متحده قومی موومنټ په ګوته کړی دی له سره وڅیړل شی .

دپاکستان  ځینو نورو سیاسی ګوندونو چې د ملی پارلمان څوکۍ یې ګتلی دی هم د تحریک انصاف ملاتړ اعلان کړی دی .

په دغو ګوندونو کښې مسلم لیګ قاید اعظم څانګه  چې څلور(۴) څوکۍ لری ، ستر ډیموکراټیک ائتلاف چې دوې (۲)څوکۍ لری ، بلوچستان عوامی ګوند چې څلور(۴) څوکۍ لری ، عوامی مسلم لیګ چې یوه (۱)څوکۍ لری او جمهوری وطن ګوند چې یوه(۱) څوکۍ لری شامل دی .

تراوسه له شپاړسو (۱۶)ازادو کاندیدانو څخه  نهو(۹)د تحریک انصاف ملاتړ اعلان کړی دی .

دپاکستان تحریک انصاف د پارلمان په انتخاباتو کښې یوسل شپاړس (۱۱۶)څوکۍ ګټلی دی او دحکومت دجوړولولپاره دنورو ګوندونو ملاتړ ته ضرورت لری .