د یمن خلک هیڅکله ذلت نه مني
زمونږ خبریال وايي د یمن د انصار الله غورځنګ مشر عبداالمالک بدر الدین الحوثي په دې خبرې باندې ټینګار سره چې د یمن ملت به هیڅکله ذلت ونه مني وویل ماتي په یمن باندې د تیریګرو حتمي برخلیک دی .
یمن له دوه زره پینځلسم (۲۰۱۵) میلادي کال راهسې د سعودي عربستان د تیریګر ائتلاف له څاروي ډوله حملوسره مخامخ دی او په یمن کښې د سعودي عربستان او د هغه د ملګرو هیوادونو جنګ غوښتنې تراوسه د دغه هیواد په سلګونو زره خلک مړه او ژوبل کړي او څلور (۴) میلیونه نور یې کډوال کړي هم دي .
د یمن د انصار الله غورځنګ مشر عبدالمالک بدرالدین الحوثي په دې خبرې باندې ټینګارسره چې د یمن ملت نن په حقیقي معنا بریالی شوی دی وویل هغه کسان چې ګمان کوي د امریکا د بریتانیا او د صهیونیسټ رژیم د رضایت په جلبولو سره به بریالي شي وهم لري او ماتي د هغوې حتمي برخلیک دی .
دغه راز د یمن د پوځ لوی درستیز هم ټینګار وکړ د یمن توغندیو او بې پایلوټه الوتکو د تیریګر ائتلاف د هیوادونو ژورتیا ته دقیق او دردونکي ګوزارونه ورکړل او د یمن په ګټه یې د قوا انډول بدل کړ .
د یمن د پوځ لوی درستیز محمد الغماري پرون وویل د دغه هیواد ځواکونه د سعودي عربستان او د متحد عربي اماراتو له ائتلاف سره د مقابلې لپاره سټراټيژیکې دفاعي وسلې په اختیار کښې لري .
