نتانیاهو د صهیونیسټي ښارګي میشتو د ترهګرۍ مسئول دی
د فلسطین د کورواکه تشکیلاتو د بهرنیو چارو وزارت ټینګار وکړ چې د صهیونیسټي رژيم کابینه او د دغه رژیم وزیراعظم بنیامین نتانیاهو د فلسطین د خلکو خلاف د صهیونیسټي ښارګي میشتو د ترهګرۍ مسئول دی.
د فلسطین د کورواکه تشکیلاتو د بهرنیو چارو وزارت د یوې خبرپاڼې په خپرولو سره ټینګار وکړ چې د موقته صهیونیسټي رژیم وزیراعظم بنیامین نتانیاهو، د فلسطین د خلکو خلاف د صهیونیسټي ښارګي میشتو د ترهګرۍ مسئول دی ځکه چې د نتانیاهو کابینې، د شخړې، جنایت او د فلسطین د خلکو د حقوقو د چخڼي کولو سیاست غوره کړی دی.
دغې وزارتخانې په دې خبرې سره چې د نتانیاهو د کابینې دا اقدامات د فلسطین د خلکو د شهیدولو لپاره د صهیونیسټانو د راپاریدو او لمسیدو لامل شوي دي، څرګنده کړه: په اسرائیلو واکمن ائتلاف د شخړو د هواري لپاره هر ډول سیمه ایز کوشش ناکامه کوي.
د فلسطین خارجه وزارت په پاې کښې ټینګار کړی دی، نړیوالې ټولنې د بین المللي پریکړه لیکونو په وړاندې دوه ګونې سیاست خپل کړی دی، په دې وجه د صهیونیسټي رژيم خلاف باید مخه نیونکې سزاګانې اعمال شي ترڅو د فلسطین د مسئلې په هکله صادر شوي پریکړه لیکونه اجرايي کړي.
په عین حال کښې د حماس غورځنګ یو مشر حسین ابوکویک تیر ماښام دې ته په اشارې سره چې په لویدیځې غاړې کښې مقاومت، دښمن ته یو مضبوط ځواب ورکړ، د نیواکګرو خلاف د مبارزې او مقاومت په دوام باندې ټینګار وکړ.
هغه وویل: د نیواکګر رژیم د ځپنې او ترهګرۍ ټولې طریقې به د فلسطین ولس هیڅکله تسلیمیدو ته مجبور نه کړې شي.
د ویلو ده چې د اردن سیند په لویدیځې غاړې کښې له تیرو څو ورځو راهیسې د صهیونیسټي پوځیانو او فلسطیني مبارزانو ترمینځ نښتې روانې دي.
