په غزه باندې د صهیونیسټي پوځ پراخ بریدونه روان دي
پارس ټوډې – د نن یکشنبې له سهار راهیسې په غزې ښار د صهیونیسټي رژیم د پوځ پراخ بریدونه پیل شوي دي.
د اسراییلو د پوځ بې پیلوټه الوتکو د غزې په ختیځ کې د التفاح سیمې د «الأیبکی» جومات خواوشا فلسطینیان په نښه کړل. ورته مهال د اسرائیلو جنګي الوتکو هم د غزې ښار په څو سیمو باندې د خپلو سختو بریدونو لړۍ ته دوام ورکړ.
د ښار په مرکز کښې د نیواکګر پوځ توپخانې د «النفق» سړک د خواوشا سیمې سختې بمباري کړې. همداشان په الدرج سیمه کښې په یو کور باندې د هوايي برید له امله څلور کسان شهیدان او ځیني نور ټپیان شول.
د غزې په شمال لویدیځ کښې هم بوږنونکې چاودنې وشوې، چرته چې د اسرائيلو پوځ بم ایښودل شوي زغرګاډي د«المخابرات» برجونو ته څیرمه د هستوګنو سیمو په مینځ کښې وچاودول.
له بلې خوا د صهیونیسټي رژیم توپخانې د غزې په شمال لویدیځ کښې شیخ رضوان سیمه سخته وویشتله او ورته مهال د اسرائیلو یو آپاچي چورلکې هم د غزې ښار په ختیځه برخه کښې په خلکو ډزې وکړې.
عیني شاهدان د دغو بریدونو له امله د بوږنوونکو صحنو د رامینځته کیدو خبر ورکوي.
