صیهونیسټي چارواکی: د اسرائیلو پر وړاندې د بریتانیا بندیزونه خطرناک دي
پارس ټوډې ـ د صیهونیستی رژیم اپوزیشن مشر د دغه رژیم پر وړاندې د اقتصادي محدودیتونو لګولو په اړه د بریتانیا پر پرېکړې سختې نیوکې کړي او دغه بندیزونه یې «ناسم او خطرناک» اقدام بللی دی.
زمونږ د خبریال د راپور له مخې،د اسرائیلو رژیم مخالف سیاسي مشر یائیر لاپید د اسرائیلو پر وړاندې د بندیزونو او اقتصادي محدودیتونو لګولو په اړه د بریتانیا د حکومت د پرېکړې په غبرګون کې دا اقدام «ستره تېروتنه» بللی او ویلي یې دي چې دغه سیاست «ناسم، خطرناک او نامناسب» دی.
هغه د اسرائیلو د رژیم د ځینو ښي اړخو وزیرانو افراطي فعالیتونو ته په اشارې سره وویل، د بریتانیا دغه پرېکړه به ، هغه هم د (پارلمان) د ټاکنو په درشل کې، د کړکېچونو د زیاتېدو لامل شي.
د اسرائیلو د رژیم مخالف سیاسي مشر هم ادعا وکړه چې د بریتانیا پرېکړه د کورنیو سیاسي انګېزو له مخې شوې او لندن هڅه کوي چې د ناراضه رایه ورکوونکو ملاتړ ترلاسه کړي.
دا څرګندونې وروسته له هغه وشوې چې د بریتانیا حکومت د اسرائیلي مېشت ځایونو د پراخېدو او په لوېدیځه غاړه کې د اسرائیلي مېشتو کسانو د تاوتریخوالي د زیاتېدو په غبرګون کې، د سې شنبې په ورځ د اسرائیلو د رژیم پر وړاندې د اقتصادي بندیزونو د لګولو پرېکړه اعلان کړه؛ هغه دریځ چې د اسرائیلو د رژیم د چارواکو غوسه یې راوپاروله.
د دې پرېکړې په تعقیب، فرانسې او کاناډا هم اعلان وکړ چې په اسرائیلي مېشت ځایونو کې د تولید شویو محصولاتو د واردولو د منع کولو او د دغو مېشت ځایونو او د هغوی د پراختیا له بهیر سره د تړلو کسانو پر وړاندې د هدفي اقداماتو لپاره به ګامونه پورته کړي.
