د آستانه په مذاکراتو کښې د سوري مخالفانو کړچار منفي دی

د سوریې په چارو کښې د روسیې د ولسمشر استازي د آستانه د خبرواترو په بهیر کښې د سوري مخالفانو په کړچار نیوکه وکړه او هغه یې غیررغنده وباله.

ایرنا لیکلي چې د قزاقستان په پلازمینه آستانه ښار کښې د سوریې په اړه خبرواترو کښې د روسي پلاوي مشر الکزینډر لاورنتِیُف تیره شپه د سوریې د مخالفو وسله والو بې بنیاده تورونو ته په اشارې سره چې د روسیې هوايي ځواکونه یې د پرخپلو سنګرونو په بمبارۍ تورن کړي وو، څرګنده کړه: په آستانه کښې د سوریې مخالفان غیررغنده کړنلاره لري او بې له هیڅ ډول شواهدو د روسیې هوايي ځواکونه په حما او درعا سیمو کښې پر خپلو سنګرونو باندې په حملو تورنوي.

هغه زیاته کړه: داسې ښکاري چې سوري مخالفان د آستانې په مذاکراتو کښې هیڅ ژمنه کول نه غواړي او په همدې وجه د دې غونډې د ناکامولو لپاره له هرې ممکنې طریقې ګټه پورته کوي.