عرب اتحادیې د تل ابیب نوې پریکړې ته سخت غبرګون وښود
عرب اتحادیې په ختیځ قدس کښې په فلسطیني ځمکو کښې د څه باندې اتو سوو نویو کورونو د جوړولو لپاره د صهیونیسټی رژیم پریکړه وغندله.
النشره خبري ویب سایټ لیکلي چې عرب اتحادیې په ختیځ قدس کښې په فلسطیني ځمکو کښې د څه باندې اتو سوو نویو کورونو د جوړولو لپاره د صهیونیسټی رژیم پریکړه وغندله او هغه یې د نیواکي قدس ښار د کلابندۍ د بشپړولو او د فلسطینیانو د بې کوره کولو په لړ کښې وبلله.
عرب اتحادیې ټینګار وکړ چې د اسرائیلو توکمپال اقدامات او ښارګي جوړونه ناروا او د ټولو نړیوالو پریکړه لیکونو او قوانینو او ژمنو خلاف ورزي ده.
دغې اتحادیې زیاته کړه: د نړیوالې پوښتنې نشتوالی او له نیواکګرو د امریکې ملاتړ د فلسطین خلاف د حملو دوام او د مقدساتو د حرمت سپکاوي او د ښارګي جوړونې زیاتولو او د نړیوالو قوانینو او پریکړه لیکونو خلاف ورزۍ ته د هغوي د هڅیدو د دوام سبب شوی دی.
