چین او طالبان خپلې تجارتي او ډيپلوماټیکې اړیکې پراخوي
زمونږ خبریال وايي د چین د بهرنیو چارو وزیر او په افغانستان کښې د طالبانو د موقته حکومت د خارجه وزارت سرپرست د تجارتي او د ډیپلوماټیکو اړیکو د پراخولو په زمینه کښې موافقه وکړه .
د طالبانو د خارجه وزارت سرپرست امیر خان متقي پرون د قطر په پلازمینې دوحې کښې د چین د بهرنیو چارو د وزیر« وانګ يي »په مشرۍ د چین له پلاوي سره کتنه او خبرې وکړې .
د طالبانو د خارجه وزارت ویاند عبدالقهار بلخي وویل په دغه کتنې کښې په راتلونکي کښې د ډيپلوماټیکو او د تجارتي اړیکو د پراخولو لپاره د ګډ سازوکار د رامینځته کولو په هکله موافقه وشوه .
د طالبانو د خارجه وزارت سرپرست امیر خان متقي وویل په چین کښې د افغانستان د سوداګرانو د مشکلاتو حل کیدل له افغانستان څخه چین ته د درملیزو بوټو صادریدل او په چین کښې د افغانستان د محصیلینو لپاره د اسانتیاو برابرول د دواړو هیوادونو د پلاویو د خبرو اترو نور چورلیزونه وو .
د افغانستان د خارجه وزارت سرپرست امیر خان متقي په دغه کتنې کښې ډاډ ورکړ چې د افغانستان له خاورې به د چین پرضد استفاده ونشي .
د چین پلاوي هم په دغه کتنې کښې له افغانستان سره د بشر دوستانه مرستو په دوام ټینګار کړی دی .
د چین د بهرنیو چارو وزیر وانګ یي هم په دغه کتنې کښې د افغانستان د ځمکنۍ بشپړتیا د اصل په ساتلو باندې د ټینګار په ترڅ کښې په طالبانو ډلې غږوکړ په هیواد کښې د ټولشموله حکومت د جوړولو هڅه وکړي .
هغه وویل چین له افغانستان سره دوه اړخیزه ملګرتیا ته دوام ورکوي او د دغه هیواد په کورنیو چارو کښې لاسوهنه نه کوي .
د چین خارجه وزیر دغه راز د افغانستان د ټولنې د وحدت لپاره د طالبانو ډلې د هڅې پرضرورت ټینګار وکړ او له دې سره په یووخت یې له نړیوالې ټولنې وغوښتل چې له افغانستان سره له مرستو ډډه ونکړي .
