د ودګني غوښتنه د ناوي د انکار سبب شوه
زمونږ خبریال راپور راکړی د هندوستان یوه ودګني د واده د مراسمو په وخت داسې غوښتنه وکړه چې ناوي جنج یعني ورا ستنه کړه.
په هندوستان کښې د ودګني لخوا د جهیز د غوښتنې په وجه ناوي له واده څخه بیخي انکار وکړ او جنج یعني ورا یې خالي لاس ستنه کړه.
دغه پیښه د هندوستان په هیماچل پردیش صوبې کښې په بنګانا ښار کښې هغه وخت رامینځته شوه کله چې ودګنی له جنج سره یوځاې د ناوي له مور او پلار څخه وغوښتل چې ده ته په جهیز کښې یو ګاډی ورکړي.
ودګني د ناوي له مور او پلار څخه د زیاتو پیسو او دغه راز د سرو زرو غوښتنه هم وکړه.
د ودګني د دغو غوښتنو په اوریدو سره د ناوي مور او پلار بیخي وارخطا شول خو ناوي حوصله له لاسه ورنکړه او هغې له واده څخه کلک انکار وکړ چې له کبله جنج خالي لاس ستون شو.
د ناوي د خور په غوښتنه د ودګني او د هغه د مور او پلار پرضد د جهیز د غوښتنې په وجه محکمې ته درخواست ورکړل شوی.
