ځنګل کښې سړي یودیرش ورځې چینجي خوړل او ژوند پاتی شو
زمونږ خبریال وايي د جنوبي امریکا د یوه هیواد بولیویا ښاریز د برازیل هیواد په ایمازون ځنګلونو کښې په بې درکه کیدا سره تر یودیرشو ورځو پورې د حشراتو او د چینجیو په خوړلو سره خپل ځان ژوندی وساته.
راپورونه وايي چې د بولیویا هیواد ښاریز دیرش کلن جوناتن اکوسټا په شمالي بولیویا کښې د مرغانو د ښکار کولو په وخت له خپلو څلورو نورو ملګرو څخه ورک شوی و.
ځايي خلکو او دوستانو یوه میاشت وروسته د جوناتن اکوسټا لټون پیل کړ.
د بولیویا دغه ښاریز جوناتن اکوسټا وویل چې ما په خپلو څپلیو او پیزار کښې د باران راغونډې شوي اوبه وڅښلې او له ځنګلي ځناورو څخه پټ شوي چینجي مو خوړل.
هغه وویل تاسو به باور ونکړئ چې په دغه وخت کښې ما چینجي وخوړل د خدای پاک مننه کوم چې ماته یې نوی ژوند راکړ.
راپورونه وايي چې د جوناتن اکوسټا د ژغورل کیدا په وخت د هغه په بدن کښې د اوبو کمی و او پښې یې ژوبلې شوي وي او اولس کلوګرامه وزن یې کم شوی و.
