جاپان افغانانو ته د بورسونو ورکول پيل کړي

په افغانستان کې د جاپان سفارت اعلان کړی، چې افغان زده کړیالانو ته به د ماسټرۍ او دوکتورا په برخه کې بورسونه ورکړي.

د هېواد ورځپاڼې د خبر له مخې، د چاپان سفارت چارواکو ويلي، چې د زده کړیالانو د ټاکلو پروسه به د آغا خان بنسټ په همکارۍ ترسره شي.

له ۳۵ کلونو څخه کم عمر، د انګليسي يا جاپاني بشپړه پوهه او غوره تعليمي لاسته راوړنې د جاپان سکالرشپ له شرايطو څخه دي.

د دې بورسونو ترلاسه کوونکي به د ۲۰۲۴ميلادي کال په اپريل کې جاپان ته سفر وکړي.

څه موده وړاندې جاپان د دې هېواد په مالي مرسته په باميانو ولایت کې د يوه ښوونځي، ټولنيز مرکز او د اوبو برښنا د يوې کوچنۍ فابريکې د جوړولو اعلان کړی وو.