امریکایی خپرونه : د ټرمپ جعلي سولې تړونونه خطرناک دي

پارس ټوډې - فارن پالیسي مجلې په یوه یادښت کې لیکلي: ټرمپ د سولې په اړه ډیرې خبرې کوي، او هرڅوک په څرګنده توګه پوهیږي چې د دې دلیل د نوبل د سولې جایزې ترلاسه کولو کې د هغه لیوالتیا ده. هغه په هر فرصت کې وايي چې هغه لږترلږه اته جګړې پای ته رسولي دي؛ خو دا خبرې یوازې ادعاوې دي.

امریکایی مجلې فارن پالیسي په یوه تحلیلي یادښت کې لیکلي: د متحده ایالاتو د ولسمشر ډونالډ ټرمپ ځانګړتیا د "پوټیمکین" په نوم د سولې پلانونو کې ده؛ سمبولیک تړونونه چې ډیر ژر له منځه ځي. پارس ټوډې د فارن پالیسي په حواله لیکی، د غزې ۲۰ نکاتي پلان، هغه  پیکج چې ټرمپ یې "نه یوازې د جګړې پای، بلکې د ترهګرۍ او مرګ د دور پای" بللی، نه یوازې په دې تراړه  کې شخړې پای ته نه رسولي، بلکې د لویدیځې غاړې د اسراییلو خاموش اشغال او د فلسطینیانو په وړاندې د رژیم ظالمانه چلند ته یې هم لاره هواره کړې. له هغه وخت راهیسې چې په اکتوبر کې اوربند پای ته رسیدلی، شاوخوا ۴۰۰ فلسطینیان وژل شوي، او مرستې کافي نه دي.

ایا څوک په ریښتیا باور لري چې د "راتلونکي فلسطیني دولت ته د لارې" لپاره دا مبهم پلان ریښتینی دی او په حقیقت کې به کار وکړي؟ دا د ریښتینې سولې په لور یو ګام نه و؛ دا یوازې د "لوی اسراییل" د رامینځته کولو او په نهایت کې د فلسطینانو د هویت لرونکي ملت په توګه د له منځه وړلو هڅو لپاره یو پوښ ​​و. په اوکراین کې، ټرمپ د ولسمشرۍ لپاره کمپاین وکړ، ژمنه یې وکړه چې "24 ساعتونو کې" جګړه پای ته ورسوي. هغه ادعا چې په هغه وخت کې تشه ښکاریده. اوس، د هغه د ادارې نږدې یو کال تیر شوی، د هغه هڅې چې دواړه خواوې د جګړې بندولو لپاره وهڅوي لا تر اوسه پایله نه ده ورکړې.

په ورته ډول، د ټرمپ ادعا چې د کمبوډیا-تایلینډ سرحدي جګړه پای ته رسیدلې ده بې بنسټه ده. دواړو هیوادونو په دې وروستیو کې دښمني بیا پیل کړې، د تایلینډ لومړي وزیر له ټرمپ سره په تلیفوني اړیکه کې د اوربند غوښتنې رد کړې. په سوډان او کانګو کې، د کورنیو جګړو د پای ته رسولو لپاره د متحده ایالاتو هڅې هم ناکامې شوې دي. د هند لومړي وزیر نریندرا مودي د ټرمپ هغه ادعاوې رد کړې چې هغه د هند او پاکستان ترمنځ د سرحدي نښتو مخه نیولې ده. په دې ټولو قضیو کې، د سولې په لور د پرمختګ په اړه د ټرمپ ادعاوې مبالغه شوې دي.

فارن پالیسي زیاته کړه: دا بې ګټې هڅې د هغو اقداماتو سره مل دي چې د نړۍ په نورو برخو کې د جګړې اور ته لمن وهي. ټرمپ له  اسراییلو سره همکاري وکړه کله چې یې پر ایران برید وکړ؛ هغه په ​​افغانستان، نایجریا، سومالیا، لیبیا، عراق، سوریه او یمن کې د توغندیو بریدونو امر هم کړی دی. د ټرمپ اداره په بې پروایۍ سره په کارابین کې د مخدره توکو د شکمنو قاچاق وړونکو "غیر قضايي وژنې" ترسره کوي، چې د متحده ایالاتو او نړیوالو قوانینو څخه ښکاره سرغړونه ده. ټرمپ د وینزویلا د ولسمشر نیکولاس مادورو د حکومت د نسکورولو لپاره د پوځي ځواک کارولو ګواښ هم کوي. دا د "سولې جوړونکي" لقب وړ ریکارډ نه دی.

امریکایی خپرونې ویلي: ټرمپ یو بیړه ناک  کس دی چې له  جزیاتوسره  لیوالتیا نلري. د هغه د لنډ نظر له امله، د هغه مخالفین پوهیږي چې دوی کولی شي تر هغه پورې انتظار وکړي چې هغه پریږدي او بیا خپلو پالیسیو ته دوام ورکړي. له یوې خوا، ټرمپ هم غوره ګڼي چې د مسلکي ډیپلوماتانو پرځای د "شوقیه ډیپلوماتانو" لکه سټیو ویټیکر یا جیرډ کوشنر سره کار وکړي. له بلې خوا، ټرمپ او د هغه غوره شوي استازو بې طرفه عمل نه دی کړی. په پایله کې، ځینې ښکیلې خواوې پر دوی باور نه کوي، او امریکایي منځګړي احتمال لري چې یو اړخیز حلونه وغواړي چې هیڅ ځای ته ونه رسیږي یا د لاسلیک کیدو وروسته سمدلاسه له منځه لاړ شي.