د ایکس کاروونکي ټرمپ ته! ایران نه، آمریکاییان وژغورئ

پارس‌ ټوډی – د ایکس ټولنیزې شبکې کاروونکو د امریکا ولسمشر ډونالډ ټرمپ دا ادعا چې ګواکي د ایران خلک به وژغوري، د طنز موضوع ګرځولې ده.

د امریکا ولسمشر ډونالد ټرمپ په دې وروستیو کې په تروث سوشل شبکه کې لیکلي وو: که د ایران امنیتي ځواکونه پر سوله‌ییزو مظاهره‌چیانو ډزې وکړي، نو متحده ایالات "د ډزو لپاره چمتو" دي.

دا ادعا د ایکس کاروونکو سخت غبرګون پارولی دی چې پارس‌ ټوډی ورته کتنه کړې.

د ایکس کاروونکي سومیت راج د ټرمپ د دې ادعا هدف روښانه کړی او لیکلي یې دي: "د امریکا هدف ژغورنه نه ده، بلکې د ایران تېل او ګاز دي."

بل کاروونکي "بلک" له ایران غوښتي چې امریکا په ښوونځیو کې له ډزو وژغوري.

هغه لیکلي: "ولې ټرمپ په ټولو موضوعاتو کې لاسوهنه کوي؟ دا ایران دی چې باید امریکا د ښوونځیو له ډزو وژغوري."

ایراني کاروونکي "سیدمحمد مرندي" لیکلي: "د امریکا رژیم د دې لپاره چې وژنې او لوټ وکړي، په ټولو شیانو درواغ وایي. امریکا لوی شیطان دی."

بل کاروونکي "هایدو" د ټرمپ په همکارۍ د صهیونیستي رژیم له خوا د غزې د خلکو نسل‌وژنې ته اشاره کړې او لیکلي: "آیا ټرمپ تر اوسه د غزې د بې‌ګناه ماشومانو او ملکيانو د ژغورلو لپاره کوم کار کړی؟ نه، هغه د نسل‌وژنې شریک دی او لا هم اسرائیل وسله کوي."

د ایکس فعال "مانیش دابي" د امریکا پر ونزویلا برید ته اشاره کړې او لیکلي: "د ټرمپ دا ادعا چې د ایران خلکو سره مرسته کوي، په داسې حال کې ده چې امریکا پر ونزویلا برید کړی او د دې هېواد قانوني ولسمشر یې تښتولی دی."

بل کاروونکي "مایند پالس" د ټرمپ څرګندونې پر ایران روښانه ګواښ بللی او لیکلي: "دا د مظاهره‌چیانو ژغورنه نه ده؛ دا د امریکا د لاسوهنې حق ساتل دي. ژبه په عمدي توګه مبهمه ده، محرک نامعلوم او ګواښ روښانه دی. 'حقوق بشر' بهانه ده."

"ابوهانتر" بل کاروونکی لیکي: "امریکا باید لومړی خپلو خلکو ته رسېدنه وکړي. ولې ناڅاپه د ایران خلکو لپاره دومره خواخوږي؟ دا د دوی ملت دی، د دوی قانون دی، دوی به یې حل کړي. دا د شیطان لپاره بله جګړه ده."

په همدې اړه "اوکس نامبر" لیکلي: "دا سړی ولې تل غواړي په نورو هېوادونو کې لاسوهنه وکړي؟ هغه خپل خلک نه لري چې ورته رسېدلي وکړي؟"