ګوترش: د افغان ښځو پر کار بندیز دې سمدستي لغوه شي
د ملګرو ملتونو سرمنشي انتونیو ګوتېریش په یو خپاره کړي بیان کې د افغان ښځو او نجونو پر وړاندې د طالبانو د «تبعیضي» سیاستونو په غندلو سره، له طالبانو وغوښتل چې د ملګرو ملتونو په دفترونو کې د افغان ښځینه کارکوونکو پر کار بندیز سمدستي لغوه کړي.
د تاند خبري سایټ د خبر له مخې، ګوټیریش په دې بیان کې ویلي چې د طالبانو دغه سیاستونه د ښځو او نجونو لومړني حقونه تر پښو لاندې کوي او د افغانستان د اقتصادي پرمختګ، ثبات او نړیوالې ټولنې ته د بېرته ورګرځېدو پر وړاندې جدي خنډ جوړوي.
د ملګرو ملتونو سرمنشي همداراز ویلي د وږي په ۱۶مه یعنې نن، یو کال پوره کېږي چې طالبانو په ټول افغانستان کې د ملګرو ملتونو دفترونو ته د افغان ښځینه کارکوونکو پر ننوتلو بندیز لګولی دی.
هغه وویل، دغه بندیز د ملګرو ملتونو د منشور په ګډون، د نړیوالو قوانینو له اصولو سره په ټکر کې دی او د افغانانو لپاره د مرستو رسولو په برخه کې د ملګرو ملتونو وړتیا یې محدوده کړې ده.
ګوټېریش ټینګار وکړ چې په کاري ځایونو کې د ملګرو ملتونو د ټولو کارکوونکو حضور د دې سازمان د فعالیتونو د دوام او د زیانګالو خلکو، په ځانګړي ډول ښځو او نجونو، د اړتیاوو د پوره کولو لپاره ضروري دی.
هغه زیاته کړې چې د ښځینه کارکوونکو له حضور پرته، افغان ښځو او نجونو ته د بشري مرستو او اړینو خدمتونو رسول لا ستونزمن کېږي.
