هندي پوځیانو شپږ کشمیریان ووژل

هندي پوځیانو په کشمیري معترضانو باندې په ډزو سره شپږ تنه ووژل.

د ایسوشیئیټډ پریس د رپورټ له مخې د هندوستان تر کنټرول لاندې کشمیر کښې د هندي پوځیانو او کشمیري معترضانو ترمینځ په ننۍ نښته کښې شپږ کشمیریان او یو هندي پوځي ووژل شول.

په دې نښته کښې همداشان درې نور هندي پوځیان زخمي شوي دي.

د کشمیر اعتراض کونکو خلکو په هندي پوځیانو د کاڼو ګوذارونه وکړل او د نوي ډیلي د حکومت خلاف د یولړ شعارونو په ورکولو سره یې د دغه حکومت تر کنټرول لاندې کشمیر باندې د هندوستان د واکمنۍ د ختمیدو غوښتنه وکړه.

له نښتې وروسته په سیمه کښې د انټرنیټ او موبایل سروس بند شو او د کشمیر ټول دکانونه، سوداګریز مرکزونه او همداشان ښوونځي وتړل شول.