د غويي د شپږویشتمې نیټې ورځپاڼې

د تهران راډیو مینه والو دا دی یوځل بیا مو ورځپاڼو ته د کتنې پروګرام برابر کړی دی. په دې پروګرام کښې له معمول سره سم وړومبی د تهران چاپ او ورپسې د ځینو بهرنیو ورځپاڼو مهم مطالب او خبرونه درسره شریکوو. */*/*/*/*/*/*/*/*/*/*/*/*

د تهران چاپ ورځپاڼو په سر کښې اطلاعات ورځپاڼه راخلو چې په وړومبي مخ یې په بروکسل کښې د ایران د خارجه وزیر او د اروپايي اتحادیې د بهرني سیاست د مسئولې د ملاقات انځور چاپ کړی او د میرمن موګریني له قوله یې په غټو ټکیو لیکلي دي: برجام به برقرار پاتې شي.

هغه وايي: د اروپايي اتحادیې مشرانو پریکړه کړې تر څو چې ایران په ایټمي موافقې پابند وي، تر هغې به دوي هم پرې پابند پاتې شي.

له بلې خوا د ایران خارجه وزیر وویل: د برجام له ګټو د برخمنتیا لپاره ایران ته د ضمانت ورکول ضروري دي.

محمد جواد ظریف له میرمن فډریکا موګریني سره له کتنې وروسته څرګنده کړه چې په دغه کتنه کښې د پاتې لورو لخوا د برجام د بشپړې اجرا، د برجام له منافعو د ګټه اوچتونې لپاره ایران ته د ضمانت د ورکړې او د دې تضمین په ضرورت ټینګار وشه چې دغه ګټې د ایران او اروپا ګډ نظرونه وي.

ښاغلي ظریف په دې خبرې سره چې ضمانتونو ته د رسیدو د څرنګوالي په هکله یولړ اقدامات پیل شوي دي، زیاته کړه: برجام د ټولو لورو لپاره یولړ ګټې لري او باید ډاډ ترلاسه کړو چې یو هیواد په خپلې غیرقانوني وتنې سره له دې موافقې هیڅ ګټه نه شي پورته کولی.

د ایران خارجه وزیر څرګنده کړه: د مخکښې تګ لپاره په سمه لاره ولاړ یو څو ډاډ ترلاسه کړو چې په برجام کښې د پاتې ټولو لورو په تیره بیا د ایران ګټې خوندي شي.

**

خو د اطلاعات په شمول د تهران چاپ ډیرو ورځپاڼو په فلسطین کښې د صهیونیسټي رژيم روانو جنایتونو ته ډیر انعکاس ورکړی او په دې لړ کښې یې مختلف خبرونه راخیستي دي.

په دې لړ کښې جمهوري اسلامي د ایران د حکومت د کابینې پرونۍ غونډې ته اشاره کړې او لیکلي یې دي چې د ایران د اسلامی جمهوریت حکومت په یوه بیانیه کې د صیهونیسټانو د وروستیو جنایتونو په غندلو سره له نړیوالې ټولنې وغوښتل چې د خپلې اوږدې چُپتیا په ماتولو سره د نیواکی ټاټوبیو د حقیقی خاوندانو په توګه د فلسطینیانو د حقوقو تامینول او د نیواکګرۍ د ختمولو ضمانت ورکړي.

د ایران حکومت په پرونۍ بیانیې کې ټینګار کړی دی: د هغو مظلومو او بې وسلې خلکو   قتل عام چی د تیري او نیواک پرضد په سوله ایزو مظاهرو کې یې ګډون کړی وو ، په داسې حال کی ترسره شوی دی چی د امریکا حکومت قدس شریف ته د خپل سفارت  په انتقالولو کې د لمسونکی او غیر قانونی اقدام لپاره د جشن او خوشحالۍ کولو په حال کی وو او هغه هم د ذلت او نکبت په ورځ . د ایران حکومت په دغه بیانیه کې په دې هکله په خواشینۍ څرګندولو سره چی د سیمې د ځینو حکومتونو چارواکی چی د اسلامی نړۍ د اصلی موضوګانو او دښمنانو د دسیسو د پیژندلو لپاره ضروری اراده او فکر نلری ، ټینګار شوی دی چی د دغو هیوادونو مشران دوکه شوی دی او له صیهونیسټ رژیم سره د ښکاره او پټې دوستۍ په لاره کې  په ګام کیښودلو سره  دغه غاصب رژیم د بشری ضد او وحشیانه جنایتونو په ترسره کولو کې له سپین سترګې کړې دې .

د ایران د اسلامی جمهوریت دولت په دې په ټینګار سره چی د روژې مبارکه میاشت په وروستیو څو لسیزو کی د قدس په ورځ د فلسطینانود مظلومیت د نړیوالې ورځې  د یادولو لپاره په میعاد گاه بدله شوی ، جوته کړه: د اسلامی نړۍ لپاره په یوې فرعي موضوع د فلسطین د مسئلې د بدلولو لپاره به د امریکې او صیهونیزم نوې دسیسه یو ځل بیا له ماتې سره مخامخ شی .

کیهان:

او کیهان ورځپاڼې د غزې د خواشینونکو حالاتو په هکله د ایران د روغتیا وزیر څرګندونې راخیستې دي چې لیکي: د ایران د روغتیا وزیر په غزې کښې د انساني غمیزې د رامینځته کیدو خبرداری ورکړ

د ایران د اسلامي جمهوریت د روغتیا وزیر د روغتیا د نړیوال سازمانWHO مشر ته په یو لیک کښې په غزې تړانګه کښې د انساني غمیزې د رامینځته کیدو په هکله خبرداری ورکړ.

سید حسن قاضي زاده هاشمي پرون په یو لیک کښې د فلسطین د بې دفاع او مظلومو خلکو د بې رحمانه وژلې د غندنې ترڅنګ ولیکل: د فلسطین خلکو په غیرقانوني توګه بیت المقدس ته د امریکې د سفارت په منتقلیدو اعتراض وکړ چې په خواشینۍ سره د بیګناه فلسطینیانو په تیره بیا ماشومانو د وژلې او په فلسطین کښې د انساني غمیزې د پیلیدو سبب شو.

د ایران د اسلامي جمهوریت د روغتیا وزیر په دغه لیک کښې په دې خبرې سره چې د نړیوالو سازمانونو ذمه واري د دې بې رحمانه وژلې د دوام مخنیوی دی، زیاته کړه: د رسمي نړیوالو ټولنو چپتیا د منلو نه ده او د دې جنایت تش په غندلو بسنه نه ده پکار.

د ویلو ده چې له تل ابیب څخه نیواکي بیت المقدس ته د امریکې د سفارت د انتقال په وخت، د ملګرو ملتو د بې کفایتۍ په سیوري کښې صهیونیسټو پوځیانو د اتو ماشومانو په شمول لږترلږه ۶۰ فلسطینیان په ډزو شهیدان کړي او کابو درې زره نور یې ژوبل کړل.

کابل چاپ:

د کابل چاپ ورځپاڼو د نن ورځې اکثره مطالب پر فراه ښار د طالبانو پرونۍ حملې او په‎دې اړه پورته شویو غبرګونونو ته ځانګړي کړي دي.

ویسا

ویسا ورځپاڼې په خپل لومړي مخ کې د کورنیو چارو وزارت په حواله لیکلي چې پر فراه ښار د طالبانو د حملې مخه نیول شوې ده او ښار د افغان امنیتي ځواکونو په کنټرول کې دی.

خو ورځپاڼې د ځینو نورو سرچینو په حواله لیکلي چې د تېرې شپې تر ناوخته پورې د فراه ښار زیاته برخه د طالبانو په ولکه کې وه او نن هم د جګړې امکان شته.

ورځپاڼې په یو جلا مطلب کې د افغان حکومت په مشرانو انتقاد کړی دی او لیکلي دي، دوی له بحرانه د هېواد د ایستلو پر ځای په انتخاباتي کمپاینونو بوخت دي.

ورځپاڼه لیکي:

د فراه ولایت د سقوط په درشل کې ولسمشر د یوې عادي پروژې د پرانیستلو له‎پاره لوګر ته ولاړ او اجرائیه رئیس هم په کابل کې د ولسمشر د تېرو ورځو په څرګندونو انتقادونه کول.

ورځپاڼې لیکلي چې د حکومت دواړه مشران د هېواد له ملي مسایلو سره د خپلو ګټو پر اساس چلند کوي.

دنیا

دنیا ورځپاڼې هم په افغانستان کې د حالاتو د خرابېدو پړه د حکومت پر مشرانو اچولې او لیکلي یې دي چې فراه د ملي وحدت حکومت د کمزورۍ اوج څرګندوي.

طالبانو په‎ فراه ښار کې د ملي وحدت حکومت قدرت نندارې ته وړاندې کړ.

ورځپاڼې وړاندې په خپله تبصره کې لیکلي، په‎داسې حال کې چې د ملي وحدت حکومت مشران په حاشیه‎وي مسایلو بوخت دي، وسله‎وال مخالفین د سیمې د استخباراتي کړیو په ملاتړ د ستراتېژیکو سیمو د لاندې کولو په هڅه کې دي.

ورځپانې لیکلي دي چې همدا اوس وسله‎وال مخالفین په څو جبهو کې له افغان دولتي ځواکونو سره په جګړه بوخت دي او یو شمېر سیمې یې لاندې کړې دي چې تر ټولو خونړۍ یې د فراه پر ښار حمله ده.

د ورځپاڼې په وینا طالبانو په‎دې ښار کې د ملي وحدت حکومت قدرت نندارې ته وړاندې کړ او دا یې وښودله چې دغه حکومت په افغانستان کې د حالاتو د کنټرول او مدیریت توان نه‎لري.

ورځپاڼه لیکي چې طالبانو له مخکې نه پر فراه ولایت د حملې خبرداری ورکړی وو، خو د حکومت مشران د دې پر ځای چې د فراه له‎پاره تدابیر ونیسي، په خپل‎منځیو اختلافاتو بوخت وو.

انیس

انیس دولتي ورځپاڼې هم په خپله سرلیکنه کې لیکلي چې طالبان په لویدیځ زون کې په خپلو حملو سره هڅه کوي چې د ملي او سیمه‎ییزو اقتصادي پروژو د پلي کولو مخنیوی وکړي.

ورځپاڼې که څه هم د کوم هېواد نوم نه‎دی اخیستی، خو لیکلي یې دي چې د سیمې او ګاونډ د ځینو هېوادونو استخباراتي کړۍ هڅه کوي چې په افغانستان کې اقتصادي پروژې پلې نه‎شي او طالبان د دغو هېوادونو د اهدافو د پلي کولو هڅه کوي.

خو ورځپاڼې وړاندې پر خلکو غږ کړی چې په اتحاد او یووالي سره په هېواد کې د ملي او سیمه‎ییزو پروژو د پلي کولو پر وړاندې رامنځته شوي خنډونه لیرې کړي.

ورځپاڼې د دښمن د دغو هڅو د شنډولو له‎پاره د افغان امنیتي او دفاعي ځواکونو هڅې هم ستایلې دي او لیکلي یې دي چې په‎کار ده، له ملي ځواکونو په کلکه ملاتړ وشي.

*********////////*********