ترکیه د افغانستان د سولې د بهیر ملاتړ کوي
ټي ار ټي خبري اژانس راپور ورکړی د ترکیې د پارلمان مشر مصطفی شنتوپ وویل مونږ له طالبانو ډلې سره د افغانستان د سولې د خبرو د بهیر ملاتړ کوو .
د ترکیې د پارلمان مشر مصطفی شنتوپ په انکارا کښې د افغانستان د ملي روغې د جوړې د لوړې شورا له مشر عبدالله عبدالله سره په کتنې کښې وویل له طالبانو سره د بین الافغاني خبرو اترو د څرنګوالي بهیر ډیر اهمیت لري او د ترکیې پارلمان دغه کار تعقیبوي .
هغه وویل په افغانستان کښې جنګ باید پاې ته ورسیږي چې د هیواد خلک په ارامښت او ثبات کښې ژوند وکړي .
د ترکیې د پارلمان مشر مصطفی شنتوپ دغه راز د افغانستان او د خپل هیواد اړیکې تاریخي او د ګډو ارزښتونو پراساس وبللې .
د افغانستان د ملي روغې جوړې د لوړې شورا مشر عبدالله عبدالله هم د ترکیې له پارلمان څخه وغوښتل چې په افغانستان کښې د سولې له بهیر څخه خپلو ملاتړونو ته دوام ورکړي .
په افغانستان کښې د جنګونو د ختمولو لپاره د طالبانو ډلې او د کابل د حکومت خبرې اترې د سپتمبر د میاشتې له دولسمې (۱۲) نیټې راهسې په قطر کښې پیل شوي خو له بده مرغه د ځینو لویدیځو هیوادونو په تیره بیا د امریکا په لاسوهنې سره دواړه لوري نه دي توانیدلي کومې موافقې ته ورسیږي .
