په نړۍ کښې د امریکې بایالوجیکل ګواښونه-۴

د متعال او مهربان خدای په نامه او تاسو قدرمنو لوستونکو ته د سلامونو په وړاندې کولو سره (په نړۍ کښې د امریکې بایالوجیکل ګواښونه) نومې لړۍ له یو بل پروګرام سره ستاسو په خدمت کښې یو.

بایالوجیک کړکیچونه له پخوا راهیسې د انسان د سلامتیا لپاره جدي ګواښ ګڼل کیده او تل یې د حکومتونو او نړیوالو سازمانونو او هم د عامه خلکو لپاره ډیرې اندیښنې رامینځته کړې دي. په دې منځومان کښې ځینو هیوادونو د خپلې سلطه غواړې کړنلارې په وجه د دښمنانو او سیالانو د کنټرولولو او ختمولو لپاره له هر اوزاره کار اخیستې دی او امریکا په دې کار کښې له ټولو سلطه غواړو مخکښې ده.

په دې لړۍ کښې د په نړۍ کښې د امریکې د بایالوجیکو ګواښونو جاج اخلو او په دې څلورمه برخه کښې یې له خپلو پولو بهر د امریکې د بایالوجیکل ګواښونو څیړنه کوو.

*/*/*/*/*/*/*

لکه څنګه چې مو د دې لړۍ په تیرو پروګرانو کښې د نړۍ په مختلفو سیمو کښې د امریکې مختلفو بایالوجیکل او پوځي لیبارټریو ته اشاره وکړه، امریکا د تاریخ ترټولو ستر ویرانونکی پروګرام تعقیب کړی دی. په مریلینډ کښې د امریکې ډیر مهم بایالوجیک مرکز د نړیوالې پاملرنې او حساسیت نه پس په ظاهره د امریکې په خاوره کښې خپل فعالیتونه کم کړې دي او د دغو خرابونکو فعالیتونو ستره برخه یې نورو هیوادونو ته منتقله شوې ده.

د امریکې د بایالوجیکل لیبارټریو ډیر مهم کوربه هیوادونه، له شوروي څخه خپلواکه شوي هیوادونه دي. امریکا له خطرناکو وایرسونو سره د مقابلې په جامه کښې د شوروي د وختو له مخربو بایالوجیکل فعالیتونو سره د مبارزې په پلمه له شوروي څخه په پاتې یوشمیر بایالوجیکو لیبارټریو کښې دیره شوې ده. دغه هیواد هم داشان د تندلارو ډلو له خوا د شوروي په بایالوجیکه برخه کښې د فعالو پوهانو د جذبیدو د مخنیوي په پلمه هغوي په کار نیولي دي او یوشمیر یې ترې مریلینډ لیبارټرۍ ته او ځیني نور یې په آسیا کښې تر خپل مدیریت لاندې لیبارټریو کښې په کار لګیا کړي دي.

په دې سیم کښې د امریکې ډیرې بایالوجیکل لیبارټرۍ په جارجیا، قزاقستان، ازبکستان، آذربایجان جمهوریت، آرمینیا او یوکراین کښې دي.

*/*/*/* /*/*/*/*

په ټوله اورآسیا کښې د امریکې د ژواکي لیبارټریو  د خوریدو ډول د سیمې د مایکرو ارګانیزم microorganism په راغونډولو کښې د امریکې د هدف ښودونکی دی. له روسیې او چین سره د امریکې د سیالیو سختیدو ته په پام سره د سیمې د انساني جینوم معلوماتو راغونډولو د امریکې د بایالوجیکل لیبارټریو لپاره د دغه ډول تخصصي وسلو د جوړولو امکان برابروي. هم داشان د امریکې پټه بایالوجیکه طرحه د کرهڼې ځمکو او څارویو ته د تاوان رسولو توان لري چې د بایالوجیکې ککړتیا له لارې د هیوادونو په خوراکي امنیت کښې د جدي کړکیچ د رامینځته کیدو سبب کیدې شي. په کلي توګه ویلې شو چې په اورآسیا سیمه کښې د بایالوجیکل لیبارټریو له پراخولو د امریکې هدف روسیې، چین او ایران ته تاوان رسول دي.

د امریکې بایالوجیکل پوځي پروګرام چې په ۱۹۴۳ کال کښې په څرګنده توګه د امریکې د هغه وخت د ولسمشر فرانکلین روزولټ په حکم سره پیل شو او د دویم نړیوال جنګ په دوران کښې یې پراختیا وموندله. دغه پروګرام په ۲۷ کلونو کښې ۷ مهم زهرجن مواد تولید کړل او د امریکې پوځ یې پرې سنبال کړل.

دغه وایرسونه او زهر یوازې په یو څو ساعتونو کښې په انسانانو کښې جدي او خرابونکي بدلونونه رامینځته کوي او ورڅخه رامینځته شوي عوارض یې سخت تاوان رسوي. امریکې په خپلو ځینو پټو بایالوجیکل مرکزونو کښې د خولې د ناروغیو او مختلفو تبو په شان په یوولسو تبه رامینځته کونکو ناروغیو باندې تحقیق کړی دی. هم داشان یې په وایرسونو د کورنیو حیواناتو د ککړولو لپاره یو ځانګړې پروګرام تعقیب کړی دی. هم داشان د کوریا په جنګ کښې د امریکې له خوا د بایالوجیکل وسلو د استعمال جدي شواهد هم موجود دي او دا موضوع د روغتیا نړیوال سازمان تائید کړې ده. له دې نه علاوه په ۱۹۶۲ کال کښې د کیوبا د خلکو د خوراکي شیانو په تیره بیا د چینۍ په ککړولو کښې د امریکې له خوا بایالوجیکل زهر کارول شوي دي.

 /*/*/*/*

ګرانو ملګرو د پروګرام په دوام کښې د خپلو مخربو بایالوجیکو فعالیتونو په پټولو کښې د امریکې د مخینې یوې بلې برخې ته اشاره کوو.

د ۱۹۵۰ کال د ستمبر په شلمه نیټه د امریکې یوې سمندري بیړۍ د سان فرانسسکو په سواحلو کښې د یو ډیر ستر پایپ په کارولو سره ابرمایکروبونه په هوا کښې وشیندل. پوځ د یوې بایالوجیکل وسلې آزموینه کوله. د امریکې سمندري پوځ د سان فرانسسکو د خلکو له خبرولو پرته دغې پټې آزموینې ته دوام ورکړ. خو دا د امریکې یوازنې پټ بایالوجیکل پروګرام نه و. د ذهن د بدلونکو درملو د آزموینې او د امریکې په تور پوستو خلکو باندې د سفلیس د اثراتو د تجربې په شان نورې ډیرې خرابونکې آزموینې وشوې. تورپوستو ته ویل شوي وو چې د وینې پنډوالی یې ډیر دی او په حقیقت کښې یې په دې پلمه د زهرو آزموینه کړې وه. خو حالات هله خطرناک شول چې خبر شو چې دغه بایالوجیکل آزموینې د داسې وسلو د جوړولو لپاره وې چې د ټولنې ستره برخه تر اغیزې لاندې راوستلې شي.

په حقیقت کښې دا ډول بایالوجیکل وسلې د پوځیانو او غیرپوځیانو په نه بیلولو سره د ډیرو کسانو د قرباني کیدو سبب کیږي او د نړیوالو حقوقو له نظره په ملکي وګړو باندې د عبث او ستر کړاؤ د تپل کیدو سبب کیږي او په دې وجه د بشر او بشردوستانه نړیوالو حقوقو له نظره ممنوع دی.

*/*/*/*/*/*/*/*

د امریکې پوځ په تیرو لسیزو کښې له کاناډا سره په شمالي سرحدونو کښې د خطرناکو باکټیریاؤ د خپرولو له لارې د هغو د آزمایلو په لړ کښې یو منظم پروګرام اجرا کړی دی. په کال ۱۹۹۷ کال کښې د امریکې د ملي تحقیقاتو شورا مدعي شوه چې د امریکې د پوځ پټې آزموینې د کاناډا سرحد میشتي له خطر سره نه مخامخوي او دا څیړنې زیاتره تر حیواناتو محدودې دي.

په ۲۰۱۲ کال کښې د سنټ لویس کالج د ټولن پیژندنې استاد مارتینو ټیلر  یو رپورټ خپور کړ چې د پوځ بایالوجیکل آزموینې د (سلفیډ کاډمیوم) په نامه یو خطرناک کیمیايي ترکیب سره اړوندې دي او د دې سیمو خلک د سرطان یا کینسر له جدي خطر سره مخامخولې شي. هغه هم داشان وویل چې په دغو آزموینو کښې ځیني راډیواکټیو مواد موجود دي.

د امریکې یوه بله لړزونکې بایالوجیکل آزموینه (د نیویارک د مټرو د مسافرانو د زیانمنیدو) څیړنه ده. پوځي چارواکو هڅه وکړه چې د نیویارک ښار د مټرو په کارولو سره د مټرو له لارې د بایالوجیکل وسلو د آزادونې اندازه واخلي.

لکه څنګه چې اشاره وشوه په کومو هیوادونو کښې چې امریکا پوځي بایالوجیکل لیبارټرۍ لري، هلته د عفوني ناروغیو خپریدا ډیره شوې ده. دغه پوځي بایالوجیکل مرکزونه له وایرسونو سره د مقابلې لپاره د ژواک د خوندي طرحې تر عنوان لاندې فعالیت کوي خو د لیدلو او څارلو امکان یې نشته. په حقیقت کښې دغه لیبارټرۍ هغه مرکزونه دي چې نوي وایرسونه په کښې ټیسټ او تولیدیږي.

هم داشان له بایوترهګرۍ سره د مبارزې په پلمه په افریقې لوې وچې کښې د امریکې د پوځي لیبارټریو د فعالیت پراختیا په ۲۰۱۴ کال کښې د ابولا د لاسوهنه شوي وایرس Manipulated virus د پراخې خپریدا سبب شو. هغه وایرس چې امریکې ورته سمدستي واکسن جوړ کړ او ورسره د مقابلې لپاره یې په یوشمیر افریقايي هیوادونو کښې خپل زرګونه پوځیان دیره کړل.  

*/*/*/*/*/*/*/*/*

امریکې له پخوا څخه د خپلو سیالانو د خرابولو لپاره د بایالوجیکل عواملو او وسلو د پراخ استعمال پروګرام اجرا کړی دی. امریکې د ساړه جنګ له حالته په ګټه پورته کولو سره خپلو ډیرو بایالوجیکل فعالیتونو ته پراختیا ورکړه او له سوړ جنګ وروسته یې هم د دښمنانو په وړاندې د بایالوجیکل دفاعي قدرت د ساتنې په پلمه دغه پوځي پروګرام جاري وساته.

خو د کورنیو نیوکو په وجه دم ګړۍ د امریکې سټراټیجي په نویو هیوادونو په تیره بیا په اورآسیا، لویدیځې آسیا او افریقې کښې د خرابونکو بایالوجیکو فعالیتونو پراختیا او تعقیبونه ده، په دې اقدام سره به هم له جغرافیايي نظره هدف هیوادونو ته چې زیاتره چین، روسیه او ایران دي، لانزدې به شي او هم خپل خلک د دغه ډول لیبارټریو د فعالیت له خطره لا لرې کوي او خپل مخرب فعالیتونه له نړیوالې لیدنې څخه پټوي.

*/*/*/*/*/*/

ترجمه: عبدالماجد درانی