Delegacioni i lartë gjerman në Teheran për bisedime biznesi

Një delegacion i lartë ekonomik dhe tregtar nga Gjermania ndodhet në kryeqytetin iranian Teheran për bisedime me zyrtarë qeveritarë dhe drejtues biznesi.

Delegacioni i kryesuar nga kreu i Shoqatës Federale Gjermane për Zhvillimin Ekonomik dhe Tregtinë e Jashtme (BWA) zhvilloi bisedime të dielën me zyrtarë të kompanisë më të madhe petrokimike të Iranit PGPIC, si dhe me kreun e ICCIMA, institucioni më i madh që përfaqëson bizneset private në Iran. Kryetari i bordit drejtues të BWA Michael Schumann tha gjatë një takimi me kryetarin e ICCIMA Gholamhossein Shafei se bizneset gjermane po kërkojnë të zgjerojnë partneritetet e tyre me homologët iranianë. Schumann tha se BWA përfaqëson më shumë se 1,300 kompani dhe institute kërkimore në Gjermani, duke shtuar se përgjegjësia e tij është të ndihmojë bizneset gjermane të përfshihen në partneritete me kompani në mbarë botën dhe të ofrojë mbështetje për kompanitë ndërkombëtare të gatshme të investojnë dhe të punojnë në Gjermani. Ai tha se BWA do të kërkojë të lehtësojë dhënien e vizave për bizneset iraniane për të marrë pjesë në evente dhe takime biznesi në Gjermani. Schumann tha se vizita e delegacionit gjerman në Iran ka për qëllim kryesisht diskutimin e çështjeve të investimeve dhe transferimit të teknologjisë në sektorin petrokimik iranian. Nga ana e tij, z. Shafei tha gjatë takimit se Irani pret që furnizuesit gjermanë të respektojnë detyrimet e tyre në lidhje me dërgimin e makinerive dhe pajisjeve në fabrikat iraniane të petrokimisë bazuar në marrëveshjet e nënshkruara përpara vendosjes së sanksioneve amerikane në 2018. “Ato kompani duhet ta dinë se nëse nuk i dorëzojnë pajisjet, përfundimisht do të dëmtojnë veten, sepse ne do ta indigjenizojmë prodhimin e atyre makinerive,” tha ai i cituar nga agjencia IRIB News.