Presidenti i Iranit zotohet për përgjigje vendimtare ndaj Izraelit kriminel
Presidenti iranian Masoud Pezeshkian tha se është e domosdoshme që Teherani t'i japë një përgjigje vendimtare regjimit kriminal izraelit.
Duke iu drejtuar një sesioni të kabinetit qeveritar të dielën, Pezeshkian dënoi edhe një herë me forcë vrasjen nga Izraeli të Sejed Hasan Nasrallah, liderit legjendar të lëvizjes së rezistencës libaneze Hezbollah, në një sulm ajror masiv në Bejrutin jugor.
“Ky krim vërtetoi edhe një herë se ky regjim kriminal nuk i përmbahet asnjë prej parimeve dhe rregullave ndërkombëtare”, tha ai.
Pezeshkian shtoi se aktet kriminale të Izraelit janë të papranueshme dhe nuk do të mbeten pa përgjigje.
Ai theksoi se përvoja historike ka treguar se lëvizjet liridashëse dhe çlirimtare nuk do të zhduken me vrasjen e figurave të tyre.
“Dhjetëra njerëz të tjerë janë gati të ngrenë flamurin e luftës për drejtësi dhe kundër tiranisë”, tha Presidenti iranian.
Ai shtoi se mosveprimi ndaj krimeve të kryera nga Izraeli, SHBA dhe aleatët e tyre vetëm do t'i inkurajojë ata të kryejnë më shumë akte kriminale.
Pezeshkian theksoi rëndësinë e mbështetjes së luftëtarëve të Hezbollahut në luftën e tyre me Izraelin për të parandaluar regjimin mizor sionist që të sulmojë vendet e Boshtit të Rezistencës dhe të vrasë gra dhe fëmijë të pafajshëm.
Ai përsëriti përgjegjësinë e rëndë të vendeve arabe dhe myslimane përballë agresionit brutal të regjimit izraelit në rajon.
Presidenti iranian tha: “Vendet myslimane nuk duhet të jenë indiferente ndaj krimeve të regjimit izraelit, sepse të gjitha kombeve në mbarë botën u është dëshmuar se kush është krimineli kryesor dhe shkaktari i luftës, pasigurisë dhe vrasjeve në botë!”.
Shefi ekzekutiv iranian kritikoi gjithashtu mediat perëndimore për ndjekjen e qëndrimeve kontradiktore ndaj terrorizmit të Izraelit dhe vuri në dukje se ato ekzagjerojnë ngjarjet më të vogla në Iran, por qëndrojnë të heshtur përballë akteve kriminale të regjimit izraelit.
