Raporti: Forcat e Mbretërisë së Bashkuar mund të vendosen në Gaza nën maskën e shpërndarjes së ndihmës
Një raport ka zbuluar se trupat britanike mund të vendosen në terren në Rripin e rrethuar të Gazës nën maskën e mbështetjes së dërgesave të ndihmave sapo të hapet një rrugë e re detare muajin e ardhshëm.
Raporti, i publikuar të shtunën nga transmetuesi mediatik shtetëror britanik BBC, tha se forcat britanike – të njohura si “çizmet e lagura” – mund të drejtojnë kamionët përgjatë një rrugëkalimi të përkohshëm dhe mund të dërgojnë ndihma në një zonë të sigurt shpërndarjeje në tokë.
Sekretari britanik i Mbrojtjes, Grant Shapps pohoi se Mbretëria e Bashkuar vazhdon të marrë “një rol udhëheqës në ofrimin e mbështetjes në koordinim me Shtetet e Bashkuara të Amerikës dhe aleatët e tjerë ndërkombëtarë".
Ai, gjithashtu, deklaroi se Londra synon të krijojë më shumë rrugë ndihme humanitare, duke mos konfirmuar rolin e ardhshëm të Mbretërisë së Bashkuar pasi korridori të jetë i hapur.
Ndërkohë, Shtetet e Bashkuara të Amerikës kanë thënë se asnjë forcë amerikane nuk do të vendoset në breg, duke shtuar se një "palë e tretë" e paidentifikuar do të jetë përgjegjëse për dërgimin e ndihmave nga skela në breg.
Britania e Madhe mendohet se po shqyrton ngarkimin e trupave britanike për operacionin, pasi vendi është përfshirë në planifikimin e operacionit të ndihmës nga deti.
Megjithatë, qeveria britanike tha se një vendim përfundimtar nuk është marrë ende, duke shtuar se kryeministri duhet të shqyrtojë çështjen nëse do të vendosë "çizme" në terren apo thjesht do të ketë fuqi punëtore për të çuar kamionët me ndihma në bregun e Gazës.
Ushtria izraelite thuhet se është zotuar të garantojë sigurinë për operacionin dhe të zgjerojë hyrjen e ndihmave humanitare në Gaza.
Kjo vjen edhe pse regjimi pushtues vazhdon të pengojë dërgimin e ndihmave në Gaza në mes të luftës së tij gjenocidale në territorin e bllokuar, luftë e cila filloi në fillim të tetorit të vitit të kaluar.
Izraeli nisi luftën në Gaza më 7 tetor pasi lëvizja e rezistencës palestineze Hamas kreu operacionin e befasishëm "Stuhia Al-Aksa" kundër entitetit pushtues në përgjigje të krimeve të intensifikuara të regjimit pushtues kundër popullit palestinez.
Që nga fillimi i ofensivës, regjimi i Tel Avivit ka vrarë të paktën 34,388 palestinezë, kryesisht gra dhe fëmijë. 77,437 individë të tjerë kanë pësuar gjithashtu lëndime.
Izraeli, gjithashtu, ka vendosur një "rrethim të plotë" në Gaza, duke ndërprerë karburantin, energjinë elektrike, ushqimin dhe ujin për më shumë se dy milionë palestinezë që jetojnë atje.
