Эрон соҳиби бузургтарин зарфияти ҳуҷайраҳои бунёдии хуни банди ноф дар Ғарби Осиё

Порс Тудей - Узви ҳайати илмии Пажӯҳишгоҳи Рӯёни Эрон гуфт, ки муҳимтарин иқдоми феълии ширкати фанноварии бунёдҳои Рӯён, захирасозии ҳуҷайраҳои бунёдии хуни банди ноф аст.

Хуни банди ноф ба унвони як манбаи арзишманди ҳуҷайраҳои бунёдӣ, нақши ҳаётӣ дар дармони бемориҳои хунӣ дорад.

Ба гузориши Порс Тудей ба нақл аз ИСНА, Муртазо Зарробӣ, узви ҳайати илмии Пажӯҳишгоҳи Рӯёни Эрон эълом кард, ки ин бонк акнун бузургтарин зарфияти захирасозии хуни нофро дар минтақаи Ғарби Осиё дар ихтиёр дорад. Мудири омили Бонки ҳуҷайраҳои бунёдии хуни нофи Рӯёни Эрон бо ишора ба фаъолиятҳои ин бонк гуфт: Муҳимтарин иқдоми феълии ширкати фанноварии бунёдҳои Рӯён, захирасозии ҳуҷайраҳои бунёдии хуни ноф аст.

Зарробӣ бо баёни ин ки ҳуҷайраҳои бунёдии хуни ноф метавонанд дар дармони бемориҳое бо маншаи хунӣ монанди анвои саратонҳои хун, камхуниҳои модарзодӣ, талассемия ва нуқси системаи иммунӣ истифода шаванд, таъкид кард, ин ҳуҷайраҳо метавонанд ҷойгузини пайванди мағзи устухон дар беморони мубтало ба бемориҳои хунӣ шаванд.

Вай афзуд, мо солона беш аз 20 ҳазор намунаи хуни нофро захирасозӣ мекунем. Узви ҳайати илмии Пажӯҳишгоҳи Рӯёни Эрон ҳамчунин бо ишора ба захирасозии намунаҳо аз соири кишварҳо гуфт, илова бар намунаҳои дохилӣ, намунаҳои мутааддиде аз кишварҳои дигар низ дар Эрон захира шудаанд ва акнун тақрибан ба захираи 250 ҳазор намунаи хуни ноф даст ёфтаем. Ин маҷмӯа як манбаи арзишманд барои марказҳои пайванд ба шумор меравад.