Мурғи саҳар нола сар кун...Хисрави овози Эрон даргузашт

Муҳаммадризо Шаҷариён устоди бузурги овози Эрон, пас аз чанд сол таҳаммули бемории саратон, имрӯз панҷшанбе дар синни 80 солагӣ чашм аз ҷаҳон фурӯ баст.

Ба гузориши радиои тоҷикии Садоии Хуросон, устод Муҳаммадризои Шаҷариён аз авоили ҳафтаи гузашта ба далели вазъияти ногувори беморӣ дар бемористоне дар Теҳрон бистарӣ шуда буд .
 Муҳаммадризои Шаҷариён  устоди овози Эрон, аввали меҳрмоҳи 1319 ҳиҷрии хуршедӣ баробар бо 23 сентябри 1940 милодӣ дар шаҳри Машҳади Эрон мутаваллид шуд .
Вай аз 9 солагӣ тиловати Қуръонро оғоз карду нахустин бор дар сини 12 солагӣ қироъати Қуръони ӯ аз радиои Хуросон пахш шуд .
 Муҳаммадризои Шаҷариён дар тӯли солҳои фаъолияти ҳунариаш албомҳои бисёреро ба алоқамандони шеъру мусиқӣ тақдим кард .
Оҳанги "Мурғи саҳар"-и Шаҷариён бо шеъре аз Малик-уш-Шуарои Баҳор маъруфтарин кори ӯ аст, ки тақрибан ҳамаи эрониён  онро мешиносанд .
Дуои "раббано", маъруфтарин тиловати қуръонии Шаҷариён аст ки ин асарро Созмони Мероси фарҳангии саноеи дастӣ ва гардишгарии Эрон ба унвони асари миллӣ сабт кардааст .
Бо тавваҷӯҳ ба вазъияти ҳамагирии корона  маросими ташйиъи пайкари ин устоди бузурги мусиқии Эрон баргузор нахоҳад шуд ва пайкари устод Шаҷариён  пас аз интиқол аз Теҳрон ба зодгоҳаши шаҳри Машҳад, дар шаҳри Тӯс ва дар ҷавори оромгоҳи Ҳаким  Абулқосими Фирдавсӣ ба хок  супурда хоҳад шуд .
Сайти Порстудейи радиои тоҷикии Садои Хуросон  даргузашти ин чеҳраи мондагори фарҳангу ҳунари Эронро ба тамомии форсизабонон таслият мегӯяд .