Кумитаи амнияти миллии Тоҷикистон қирғизҳоро ба танишофарӣ дар марз муттаҳам кард

Кумитаи давлатии амнияти миллии Тоҷикистон бо интишори баёнияе сокинони рустои марзии Куктоши Қирғизистонро ба ҳамла ба худравҳои сокинони ноҳияи Исфара дар вилояти Суғд муттаҳам кардааст.

Ба нақл аз сомонаи Спутник, дар ин баёния таъкид шудааст сокинони рустои марзии Куктоши Қирғизистон ахиран ба иқдомоти тоза танишофарин дар марзи муштараки ин ду кишвар дар ноҳияҳои Ботканд ва Исфара даст задаанд, ки муҷиби захмӣ шудани ду шаҳрванди Тоҷикистон шудааст.

Бар асоси ин баёния, шуморе аз рустоиёни қирғиз бо партоби санг ба самти худрави Фарҳод Аҷобуддинзода аз сокинони рустои Сомониёни ноҳияи Исфара дар ҳузури чанд корманди полиси маҳалӣ, вайро ба шиддат захмӣ карданд.

Дар ҳодисае дигар низ сокинони рустои Куктоши Қирғизистон бо партоби санг ба маршуткаи Яъқуб Юсуфов аз сокинони минтақаи Чоркӯҳи ноҳияи Исфара ва ба худрави вай осеби ҷиддӣ ворид кардаанд.

Ҳамчунин бо истифода аз афтоматҳои шикории сокинони ин рустои қирғизӣ шабона ба сӯи манзилҳои маскунии тоҷикон беш аз 16 бор шиллик шудааст.

Дар ин баёния аз такрори иқдомоти танишофарин ва хушунатбори сокинони рустоҳои қирғизӣ дар ноҳияи Ботканд алайҳи сокинони Исфара ибрози нигаронӣ шудааст.

Ин дар ҳолест, ки дар паи бурузи даргирӣ дар ин минтақа дар рӯзи 10 январ раисони ҷумҳурӣ ва вазирони умури хориҷаи Тоҷикистон ва Қирғизистон дар гуфтугӯи телефонӣ бар зарурати поён додан ба ин муноқишот ва барқарории амният дар марзи муштарак ин ду кишвар таъкид карда буданд.

Бар асоси оморҳои расмӣ, соли гузашта 14 бор байни сокинони рустоҳои ду кишвар дар марзи муштараки ноҳияҳои Исфараи Тоҷикистон ва Ботканди Қирғизистон тирпаронӣ шуд, ки дар ин ҳодиса шаш тоҷик ва як қирғиз бар асари асобати тир кушта ва 60 нафар низ захмӣ шуданд.

Тоҷикистон ва Қирғизистон 971 километр марзи муштарак доранд, ки 519 километр аз он ҳамчунон мавриди баҳси ду кишвар аст.