Боздиди вазири маориф ва илми Тоҷикистон аз бархе мактабҳои навоҳии кишвар
Вазири маориф ва илми Тоҷикистон аз бархе мактабҳои навоҳии кишвар боздид кард.
Ба гузориши радиои тоҷикии Садои Хуросон ба нақл аз сомонаи Спутник, о вуҷуди рӯзҳои башумор мондан то оғози соли нави таҳсили 2023 - 2024 бархе аз макотиб дар вилояти Хатлон ба он омода нестанд.
Ин ҳолат зимни боздиди вазири маориф ва илми Тоҷикистон Раҳим Саидзода аз бархе навоҳӣ дар ҷануби кишвар ошкор шудааст.
Ба иттилои Вазорати маорифи Тоҷикистон, шароити тадрис дар муассисаҳои таълимӣ сол то сол беҳтар гардида истодааст ва аксари мактабҳо ба соли нави таҳсил омода гардидаанду бо техникаву технологияи замонавӣ таъминанд, аммо на ҳама.
Чунин як ҳолати ногувор ва вазъи нигаронкунанда дар муассисаи таҳсилоти миёнаи умумии №6-и ноҳияи Абдураҳмони Ҷомӣ ба мушоҳида расид, афзуд манбаъ дар пайи боздиди вазири маориф аз мактаби мазкур.
Деворҳои рехтаю фарсуда, шишаҳои шикастаи тирезаҳо, рангубор нашудани фаршҳо, дар рӯйи фаршҳо "ба ҳоли зор гузоштани китобҳои дарсӣ, вазъи ногувори майдончаҳои варзишию партовҳои зиёд дар саҳну атрофи муассиса гувоҳи он аст, ки масъулин боре аз мактаб дидан накардаанд.
Ин ниҳод афзуд, ки ин муассиса дар маркази ноҳия ҷойгир буда, яке аз калонтарин муассисаҳои таълимӣ ба ҳисоб меравад.
Чунин камбудиҳо ҳамчунин зимни боздиди вазири маориф ва илм дар муассисаи таҳсилоти миёнаи умумии №3-и ноҳияи Панҷ низ ба қайд гирифта шудаанд.
Муайян гардидааст, ки макотиби мазкур на танҳо ба соли хониш, ҳамчунин ба фасли зимистон низ омода набуда, захирае аз ангишту ҳезум надоранд. Вазири маориф барои ислоҳи вазъ дастур додаст.
Ин дар ҳоле аст, ки ба гуфтаи мудирони вазорати маориф илми Тоҷикистон, сол ба сол шароити тадрис дар муассисоти омӯзишӣ беҳтар шудааст ва бештари мактабҳо барои соли таҳсилии ҷадид омодашудаанд.