Pars Today

Раиси Ҷумҳурии Тоҷикистон эълом кард, ки ҷамоати Ворухи ноҳияи Исфара таҳти ҳеч шароите ба кишвари ҳамсоя вогузор нахоҳад шуд.

Ба гузориши сомонаи “Ховар”, Эмомалӣ Раҳмон рӯзи ҷумъа дар сафар ба ҷамоати Ворух ва дидор бо сокинони ин минтақа гуфт, ки хоки Тоҷикистон муқаддас аст ва ба касе вогузор нахоҳад шуд.

Вай таъкид кардааст, ки Ҳукумати Тоҷикистон барои рушди иқтисодӣ ва иҷтимоии минтақаи Ворух барномаи вижаеро амалӣ хоҳад кард.

Раиси Ҷумҳурии Тоҷикистон изофа кард: Душанбе аз муддатҳо қабл тарҳи аломатгузории марзи муштарак бо Қирғизистонро таҳия ва ба кишвари ҳамсоя ироа карда, аммо то ба ҳол посухи мушаххасе дар ин маврид нагирифтааст. Аз ин рӯ, мавзӯи иваз кардани Ворух дар музокироти марзӣ бо Қирғизистон аслан матраҳ нест ва бештар фазосозиҳои расонаӣ аст.

Минтақаи Ворух, ки тобеи ноҳияи Исфараи вилоят Суғд аст, дар дохили хоки Қирғизистон воқеъ шудааст ва ихтилофи Душанбе ва Бишкек бар сари ин минтақа ба баҳси доғи Ҳамрохон Зарифӣ, вазири умури хориҷаи собиқи Тоҷикистон ва генерал Қамчибек Тошиев, раиси Кумитаи давлатии амнияти миллии Қирғизистон дар расонаҳо ва шабакаҳои иҷтимоӣ табдил шуд.

Зарифӣ таъкид карда буд, ки Ворух ҷузъи ҷудоинопазири Тоҷикистон аст ва бо ҳеч шароите ба Қирғизистон вогузор нахоҳад шуд.

Бештар бихонед:

• Сафари вазири кор ва муҳоҷирати Тоҷикистон ба минтақаи Ворух
• Коршиноси рус: Пешниҳоди вогузории Ворух ба Қирғизистон танишзост
• Посухи Тоҷикистон ба Қирғизистон дар бораи баррасии асноди қирғизҳои Лахш