İroni bədxahon niyyət coko iflas bıe
Yanvari 5 cımmə ruji İroni şəhəronədə Cımmə nomoji bəpeştə kutləvi şemonon təşkil bın. "Maide.az" bə "Mehr" aqentiyyəti əsasən xəbə dodə ki, əhali de "Fitnəkaron bımardon", "Amerika bımardo" şuaron iğtişaş eğandəkəson və bəvon pəlvənd beşə devləton - AİŞ, İsrail və Səudi Ərəbıstan məhkum kardəşone.
"Nur-az.com" saytən Qurcistani mısılmonon Tbilisi şəhəri çe İİR səfarəti vədə aksiya dəvunie, de "Allahu əkbər, Xamenei rəhbər" şuari bə İroni devlətə rəhbəriyyəti ıştə dastəq numayiş karde barədə nıvıştəşe. Çe İnqiltərə “Guardian” rujnomən İronədə bə ım hadison dair qıley təhliliə məğalədə nıvıştedə ki, "İroni deşmen və rəğibon bı rujonədə bənə loşxorə pərəndon İroni osmonədə cevlan kardedəbin, də umu ki, qaspu bəvon jı çi nəsib bıbo. Əmo çəvon xilyaon bə jimon dənıvarde.
Az.R nə hokuməti, nəən muxalifəti bə İroni iğtişaşon ıştə munasibət hələən əvəz kardəşon ni. Respublika Parlamenti deputat Rəfail Cəbrayılovi bo İroni cəmiyyəti bı qıvoninə rujonədə de "Big.az" sayti votemonədə bə İroni əleyh xeyli du və bıhtonono ibarət qıley qəpi rəvoc doəşe. İjo vırəş heste, çe ım "milləti vəkili"ku xəbə bısəni ki, madam tı çe İroni azərbaycanıjon huğuğon tələb kardedəş, bəc boçi ıştə devləti şəhrıvandon huğuğon çe İlham Əliyeviku tələb karde, və ya hiç nıbo MM tribunadə bə ıştə əvıjınon mənafe i kəlimə votemon karde çirət kardedəniş?
Muxalifə saytonən İronədə Cımmə ruji numayişon bəştə əhandon bənə etirazə aksiyon dəvomi təğdim kardışone. Jıqo hərəkəton Az.R cəmiyyətədə Boku hokuməti bardə antiiron siyasəti çanədə nığılə rişə ğande bə oşko bekardedə.
