Çin tojədən təkidış kardə ki de Amerkə itərəfiyə sanksiyaon muxalife.

Çini xarıci vəzarətxonə sıxənəvot zinə co kərə ım kişvəri muxalifəti de Amerkə sanksiyaon elanış karde.

Bə Fars aqentiyəti raporti əsos, Lu Kanq izhorış kardə Pikən hejo ıştə muxalifəti de Amerkə itərəfiyə sanksiyaon elan kardedə.

Çin çimiku bənav həm təkid kardə be ki bə İroni zid bıə Amerkə itərəfiyə sanksiyaon hiç faxt ğəbul nibəkarde.

Avropa ittifoğ, Russiyə, Tırkiyə və co kişvəron elan kardən ki Amerkə sanksiyaon dumo şey pidəşon ni.

Amerkə prezident Donald Tramp deşambə Avquesti 6 dəstorış doe ki bə İroni zid kali ım kişvəri ğeyri ğanuniyə sanksiyaon oqordıniye bıbu.

Tramp ijən qıləy bəyoniyədə ətomiyə sazışi qıləy dəhəştinə sazış nomış noə və elanış kardə kişvəroni ki de İroni iğtisodiyə rabitəon ğət nıkon de qonə aqibəti dim bə dim bəben.

Tramp Mayə manqi 8 Amerkə ətomiyə sazışiku xarıc bey elanış kardə.

Amerkə prezidenti ım hərəkət de dınyo zumandə tənğidon məxsusən ətomiyə sazışi co imzoəkəyon dim bə dim bıə. Britaniya, Fransə, Russiyə, Çin, Almaniya və Avropa ittifoğ elanışon kardən ki bə ətomiyə sazışi pobənd bıən və çəyku himoyədorəti bəkan.