İroni səfir:İroni hərəkəton mıdofiyə xarakterin,zəruri və bə beynəlxalğə huğuği bobe

Pars Tudey-İroni İMT-ədə bıə səfir çı AİŞ-on hərəkəton bə reqiyonal sabitəti,naviqasiya ozodəti və Farsi kandovi və Hormuzi luki əmniyyət ciddi təhdid hisob kardə holədə votəşe:İroni İslomi Respublikə,bə İMT Nizomnomə əsos,bənə ıştə xalği və suverenəti mıdofiyə kardey bıə ıştə daxili huğuğonku istifodəş kardə və istifodə kardey dəvom bəkarde.

Pars Tudey bə IRNA istinodən doə məlumoti əsos,İroni İslomi Respublikə İMT-ədə bıə səfir və dayimi nımoyəndə mıovin "Ğulamhuseyn Dərzi" Əmniyyət Şurə Ğərbi Asiyədə bıə vəzyəti anqıl iclosədə bəyonış kardə:AİŞ İronədə məktəbon,noxəşxonəon,tibbi mərkəzon,pardon,idmoni məkonon və diqər vocibə infrastruktur həm daxil bıə holədə mulki şəxson və mulki infrastrukturon ğəsdo hədəf seyə holədə canqi cinoyəton həm daxil bıə holədə,beynəlxalğə humanitarə həxon hoziyə şikilədə darıştedə.Bə Minabi məktəbi hucum ın cinoyəton ğəmənqiz və inkor kardənin nıbə numunəy. Dərzi təkidış kardə:AİŞ prezdent və diqər barzə vəzifəynə şəxson ın dəhşətinə cinoyəton oşkoə şikilədə etırof kardedən və hətto deəy fəxr kardedən.In cur sıxanon çəvon məsuliyyəti coqlə subute.AİŞ beynəlxalğə bəştə beğanunə əməlon xoto tam beynəlxalğə məsuliyyətış heste.Bə ın dəhşətinə cinoyəton xoto məsuliyyətinə fərdon di-rə səlohiyyətinə beynəlxalğə məhkəmə onemonon vədə cəvobdeh bəbeyn. Əy təkidış kardə:Hiç ki beynəlxalğə huğuğiku barz ni və hiç qıləy əmonədə mandey mevcud nibəbe. Beynəlxalğ iştimoiyyət və Əmniyyət Şurə bəpe çın cinoyəton bə normalə holi omey imkoni nıdo.Sukut və becəzo mandey fəğət çın hərəkəton təkror bey ko təşviğ bəkarde. İroni İMT-ədə bıə səfiri bəştə sıxanon dəvomış doə:İroni qırd hərəkəton mıdofiyə xarakterin,zəruri və bə beynəlxalğə huğuği bobe.