İron-Azərbaycan Avtomobilə Zavodi ıştə məhsul bə vıjor bekardəşe

2016-minə sori avğustə manqədə “İran Khodro” de “Azericar” şirkəti Natəçolə şəhərədə “Xəzər” nominə avtomobilə zavod inşa karde barədə muğavilə dəbastışonbe. Imsornə martə manqiku həmonə zavodi bə ko bino kardəşe.

“Azərmaş”muəssisə İdarə heyəti sədri bə “modern.az”i məlumat doəşe ki, Natəçolə Avtomobilə Zavodi istehsal kardə “Khazar” SD avtomobili ğıymət 16 həzo, “Khazar” LD modeli ğıymət isə 18 həzo mənote. Imən çe co analoji markonsə 20% erjone. Im avtomobilon həm de nağdə puli həmən de 4 sor muddətinə lizinqi roy hırie mumkune. Şirkəti Maşin Həvatə Mərkəz Boku şəhəri Badamdar ğəsəbədə məskune.

 Hokuməti İğtisadiyyat, Verqi, Enerqetika, Maliyyə vəzarəton, Milli Məclis, Mərkəzi Entexabatə Komissiya, Boku Nəğliyyatə muəssisə ım avtomobilon hırie ro bə “Azərmaş”i muraciət vığandəşone. Zavodi 1 sornə istehsali həcm 10 həzo ədəde. Tosə ımsori orəxi har manq 160, cəmi isə 1 həzo 500 maşin istehsal karde nəzərədə qətə bedə. Zavodi ıştə istehsali 2019-minə sori bə 3 həzo, 2020-minə sori bə 5 həzo ədəd rosnie planış heste.

“İran Khodro” şirkəti direktor Səbinə Nobari bə “Trend” sayti votəşe ki, İron və Azərbaycani ım muştərəkə muəssisə nezə vaxtonədə ıştə məhsuli bə Rusiya, Ukrayna və diqər postsovetə keşvəron vıjoron bebəkarde.