De “Qəncə hadison” əlağədar 77 nəfər dəstqir kardəşone.
Az.R Sər prokuror Zakir Qaralovi de “Qəncə hadison” əlağədar məlumat doəşe, votəşe ki, sui-ğəsd və iştişaşonədə iştirakış bıə və bəvon dastək doə odəmon siyahi tam muəyyən kardəşone. Tosə ısət 77 nəfər dəstqir bıə. 11 nəfəri nom bə axtarış doəşone.
Çəvonədə 2 nəfər bə keşvər ekstrasisiya kardə bıə. Əmandəyon vıronən muəyyən bıə, əvoniən bo təxliyyə karde ro tədbiron bə jimon dəvuniə bedə. Qaralovi ğeyd kardəşe ki, tosə ımsori orəxi ım cinayətə koy təhğiğati bə orəx bərosnen. Əmo Sər prokurori de ım hadison əlağədar devləti huğuğə muhafizə orğanon çand nəfəri tələf karde barədə sıxan votəş ni. Huğuğə mudafuəkaron isə jıqo odəmon 8 nəfəriku tosə 12 nəfəri bıe iddia bə nav dodən.
DKV-ən Nardaran ğəsəbədə tojə əməliyyat dəvunie həxədə məlumat pevolo kardəşe. Çe ım məlumatiku oşko bedə ki, polison Nardaran ğəsəbə sakinon Hatəm Cəlilov və Fəxrəddin Əlxasovi soədə axtarış bardəşone, çəvon har kəsi soədə qıley bıriə luləninə tifanq və 2 qılə parton bəmu karde bə oşko bekardəşone.
Çimi bə navən Polis və DƏX bahəm Hostoro rayoni Pensə diədə əməliyyat axtarış tədbir dəvuniəşone. Diy sakin Teymur Paşayevi “Mersedes” markaninə avtomobili salonədə qıley şikarə çaxu, çey pıə Əğədadaş Paşayevi kədə 1 qılə həfttir, 1 qılə tifanq, 7 qılə patron, 1 qılə şikarə kort musadirə kardəşone.
