İstanbuli 3 tərəfiyə iclosi oxonə bəyoniyədə i tərəfiyə sanksiyaon məhkum bıə. 

İstanbuli 3 tərəfiyə iclosi oxonə bəyoniyədə İron, Tırkiyə və Azərbaycan Respublika xarıci vəziron bə co kişvəron zidd itərəfiyə sanksiyaon oko doe məhkumışon karde. 

Bə İroni tələbəon aqentiyəti(İsna) raporti əsos ım bəyoniyədə ki zinə İstanbulədə bıə Muhəmməd Cəvad Zərif, Mulod Çavoş Oğlo və Elmar Muhəmməd Yarovi 3 tərəfiyə iclosədə imzo bıə, omə ki itərəfiyə sanksiyaon bə kişvəron miyono bıə ticarət mənfe təsironış bəbe ki bəpe çəy oko doeku vəy qətəbıbu.

İstanbuli 3 tərəfiyə iclosi oxonə bəyoniyə de təkid bə Tehroni bə ətomiyə sazışi pobənd mande və ım mığovilə hifz karde əhəmmiyyət, İ Bıə Milləton Təşkilati ozvon bə təəhhudon əməl karde iyən həmkarion çı ətomiyə sazışi çərçivədə idomə ijən bə yod vardə be. 

İron, Tırkiyə və Azərbaycan Respublika xarıci vəziron ijən təvafuğışon karde ki bə nezə mışovirəon muxtəlifə səviyədə iyən mıştərəkə məsələon barədə xuxusi məntəğə və beynəl xalğiyə təşkilati çərçivədə, əv həm sulh, əmniyyət və stabilə inkişofi bəpo karde xoto idomə bıdən. 

İstanbuli 3 tərəfiyə iclosi oxonə bəyoniyədə, 3 qılə kişvər bəştə təəhhudon bə co kişvəron ehtırom və çəvon İstiğlal iyən ərozi təmmomiyyətiku himoyədorəti karde, bıhranonni bənə Ğərəboğ mıvzo de sulhpərvərə roon həl karde iyən co kişvəron daxıli koonədə mıdoxilə nıkarde təkid kardeçoşe. 

Im bəyoniyədə İron, Tırkiyə və Azərbaycan Respublika xarıci vəziron, Zərif, Çavoş Oğlo və Muhəmməd Yarov təkid kardeşone ki 3 qılə kişvəri həmkarion zumandəti, nəğliyat sahədə de beynəl xalğiyə tranzit sistemi bəyande rabitə doe iyən hevujəti de mıtəşəkkiləti ğəsdi çimiku vey cəhd bıkən.